ជាក់ស្តែង ខេត្ត អានយ៉ាង ផ្តល់អាទិភាពដល់ការបង្ហាត់បង្រៀនភាសា ខ្មែរ នៅតាមបណ្តាឃុំ សង្កាត់ជាប់ព្រំដែន រួមចំណែកអភិរក្ស ពង្រីកភាសានិយាយ អក្សរសរសេរ និងអត្តសញ្ញាណវប្បធម៌របស់បងប្អូនជនជាតិ ខ្មែរ។ ទន្ទឹមនោះពង្រឹងការផ្លាស់ប្តូរជាមួយប្រជាជន ពង្រឹងទំនាក់ទំនងមិត្តភាពរវាង វៀតណាម និង កម្ពុជា។ ការបង្ហាត់បង្រៀន និងរៀនភាសា ខ្មែរ ត្រូវបានអនុវត្តតាមផែនទីបង្ហាញផ្លូវសម្រាប់ឆ្នាំសិក្សានីមួយៗ ក្នុងដំណាក់កាលឆ្នាំ ២០២៦ - ២០៣០ ធានាថាមិនប៉ះពាល់ដល់កម្មវិធីសិក្សាអប់រំទូទៅ។ ខេត្តព្រមទាំងបន្ត លើកកម្ពស់គុណភាពបង្ហាត់បង្រៀន និងរៀនភាសា បារាំង នៅតាមគ្រឹះស្ថានអប់រំកំពុង តែដំណើរការ។
យោងតាមមន្ទីរអប់រំ និងបណ្តុះបណ្តាលខេត្ត អានយ៉ាង ខេត្តនឹងធ្វើបមាណីយកម្មកងជួរគ្រូបង្រៀន និងទំនើបភាវូបនីយកម្មបច្ចេកវិទ្យា ផ្តល់ប្រភពកម្លាំងគួរឲ្យកត់សម្គាល់សម្រាប់ការងារបណ្តុះបណ្តាល បំប៉នកងជួរគ្រូបង្រៀន និងកម្មាភិបាលគ្រប់គ្រង។ ឆ្នាំ ២០២៧ ខេត្តមានគម្រោងបំប៉នគ្រូបង្រៀនភាសា ខ្មែរ ចំនួន ៥០ នាក់ រួមមានគ្រូបង្រៀនមត្តេយ្យសិក្សា ២ នាក់ គ្រូបង្រៀនអប់រំចំណេះទូទៅ ៤៧ នាក់ និងគ្រូបង្រៀនអប់រំអចិន្ត្រៃយ៍ ១ នាក់ គ្រូបង្រៀនភាសា បារាំង ១០ នាក់ និងគ្រូបង្រៀនគ្រោងនឹងបង្ហាត់បង្រៀនភាសាបរទេសថ្មីៗ រួមជាមួយកម្មាភិបាលអប់រំគ្រប់គ្រងគ្រប់កម្រិត ៥៤ នាក់។
សកម្មភាពបំប៉នផ្តោតលើការលើកកម្ពស់លទ្ធភាពភាសា វិធីសាស្រ្តគរុកោសល្យទំនើប បំណិនពិនិត្យវាយតម្លៃ និងប្រើបច្ចេកវិទ្យាព័ត៌មាន។ ខេត្តក៏ចាត់គ្រូបង្រៀន កម្មាភិបាលទៅចូលរួមក្នុងវគ្គហ្វឹកហ្វឺនស៊ីជម្រៅទាំងក្នុងស្រុកនិងក្រៅប្រទេសផងដែរ។
ឆ្នាំ ២០២៧ ខេត្ត អានយ៉ាង មានគម្រោងវិនិយោគប្រមាណ ៣៩ ពាន់លានដុងសម្រាប់សកម្មភាពអប់រំភាសាបរទេសរួមមាន៖ ជំរុញប្រើបច្ចេកវិទ្យាទំនើប និងបញ្ញាសិប្បនិម្មិត (AI) កសាងប្រព័ន្ធគ្រប់គ្រងសិក្ខូបករណ៍ឌីជីថល និងឃ្លាំងសិក្ខូបករណ៍ប្រើរួមគ្នាសម្រាប់វិស័យអប់រំទាំងមូល ប្រើ AI ក្នុងការរៀបចំអត្ថបទបង្រៀន ជួយទាញយកសិក្ខូបករណ៍ និងត្រួតពិនិត្យ វាយតម្លៃគុណភាព វិនិយោគប្រព័ន្ធបន្ទប់រៀនភាសាបរទេសទំនើប បំពេញតាមស្តង់ដារអន្តរជាតិ កិច្ចសហប្រតិបត្តិការអន្តរជាតិ ការផ្សព្វផ្សាយ និងសកម្មភាពផ្សេងៗ។
ការធ្វើឌីជីថលភាវូបនីយកម្មសិក្ខូបករណ៍មិនត្រឹមតែអនុវត្តចំពោះភាសា ខ្មែរ ភាសា បារាំង ប៉ុននោះទេ ថែមទាំងរៀបចំជាស្រេចសម្រាប់ភាសាបរទេសផ្សេងៗ ទៀតដូចជា ភាសា ជប៉ុន កូរ៉េ និងភាសា ចិន តាមតម្រូវការជាក់ស្តែងរបស់មូលដ្ឋាននាពេលអនាគតស្របតាមទិសដៅរបស់ក្រសួងអប់រំ និងបណ្តុះបណ្តាល។
លោក ត្រឹន ក្វាងបាវ នាយកមន្ទីរអប់រំ និងបណ្តុះបណ្តាលខេត្ត អានយ៉ាង ចែករំលែកថា ខេត្តផ្តោតលើការបង្កើតបរិស្ថានប្រើភាសាបរទេសតាមប្រក្រតី ស្និទ្ធស្នាលតាំងពីកម្រិតមត្តេយ្យសិក្សាតែម្តង។ បង្កើតគំរូ "បណ្ណាល័យបើកចំហពហុភាសា" និងលម្ហវប្បធម៌អន្តោគ្រាមបម្រើការឆ្លងកាត់ពិសោធន៍របស់កុមារ។ លម្ហបណ្ណាល័យបើកចំហនឹងត្រូវបានរៀបចំបត់បែននៅសាលា ឬនៅក្រោមម្លប់ទីធ្លាសាលារៀន ដើម្បីឱ្យកុមារម្ចាស់ការមើលសៀវភៅនិទានរឿងពីរភាសា រូបភាពវប្បធម៌ដោយមិនមានការរឹតត្បិត។ ស្របពេលនោះ ធ្នើរសៀវភៅត្រូវបានរៀបចំល្មមជំហោងដៃរបស់ប្អូនៗ...
នៅក្នុងបណ្តាតំបន់មានបងប្អូនជនជាតិ ខ្មែរ រស់នៅកុះករ “ជ្រុងវប្បធម៌មូលដ្ឋាន" ខ្នាតតូចត្រូវបានបំពាក់ដោយគំរូឧបករណ៍ភ្លេង សម្លៀកបំពាក់ប្រពៃណី ផលិតផលបោះពុម្ពពីរភាសាជាដើម បង្កើតជាលម្ហជាក់ស្តែងរស់រវើកសម្រាប់ប្អូនៗ សិស្សឆ្លងកាត់ពិសោធន៍ ផ្តើមពីនោះបំផុសចំណង់ចំណូលចិត្តរៀនភាសា និងមោទកភាពវប្បធម៌ជនជាតិ។
យុទ្ធសាស្ត្របង្រៀននិងរៀនភាសាបរទេសរបស់ខេត្ត អានយ៉ាង ឆ្នាំ ២០២៧ ដោយមានចក្ខុវិស័យដល់ឆ្នាំ ២០៤៥ រួមបញ្ចូលគ្នាយ៉ាងស៊ីចង្វាក់រវាងបច្ចេកវិទ្យាទំនើប និងតម្លៃវប្បធម៌ប្រពៃណី។ ដោយមានការវិនិយោគតាមក្បួនខ្នាតអំពីប្រភពកម្លាំងហិរញ្ញវត្ថុ និងធនធានមនុស្ស ខេត្ត អានយ៉ាង កំពុងឈានជំហានយ៉ាងរឹងមាំនៅលើវិថីធ្វើឱ្យភាសាក្លាយទៅជាឧបករណ៍ដ៏មុតស្រួចសម្រាប់សមាហរណកម្ម និងអភិវឌ្ឍប្រកបដោយចីរភាព។ នេះមិនគ្រាន់តែជាផែនការអប់រំនោះទេ តែក៏ជាផែនទីបង្ហាញផ្លូវនាំ អានយ៉ាង ឈានជំហានយ៉ាងរឹងមាំសម្រាប់សមាហរណកម្មអន្តរជាតិ៕
អត្ថបទ៖ លេ ហ៊ុយហាយ
ប្រែសម្រួល៖ អៀងថាន់
