នេះគឺជាសសរស្តម្ភដ៏សំខាន់មួយក្នុងយុទ្ធសាស្ត្រអភិវឌ្ឍន៍ដ៏ឆាប់រហ័ស ប្រកបដោយចីរភាពរបស់ខេត្ត រួមមាន៖ ការកាត់បន្ថយភាពក្រីក្រប្រកបដោយចីរភាព ការកសាងជនបទថ្មី ការអភិវឌ្ឍសេដ្ឋកិច្ច-សង្គមនៅតំបន់បងប្អូនជនជាតិភាគតិច និងតំបន់ភ្នំ។
បន្ទាប់ពីច្របាច់បញ្ចូលខេត្ត ហើយរៀបចំអង្គភាពរដ្ឋបាលឡើងវិញ ខេត្ត អានយ៉ាង មានឃុំ សង្កាត់ និងតំបន់សេដ្ឋកិច្ចពិសេសចំនួន ១០២ ក្នុងនោះមានឃុំចំនួន ៨៥។ លោក ឡេ ហ៊ឺវ ទន់ នាយកមន្ទីរកសិកម្ម និងបរិស្ថានខេត្ត អានយ៉ាង បានអោយដឹងថា ខេត្តបានបង្កើត និងពង្រឹងកម្លាំងនៃគណៈកម្មាធិការដឹកនាំការកសាងជនបទថ្មីគ្រប់លំដាប់ថ្នាក់ ចេញបទបញ្ជាប្រតិបត្តិការ ប្រគល់ភារកិច្ចដល់សមាជិកក្នុងការអនុវត្ត។ រហូតមកដល់បច្ចុប្បន្ន ខេត្តមានឃុំជនបទថ្មីចំនួន ៦៩ ឃុំ ជនបទថ្មីជឿនលឿនចំនួន ៩ និងឃុំជនបទថ្មីគំរូចំនួន ១។ ការចំណាយទុនដើម្បីអនុវត្តកម្មវិធីនេះគិតត្រឹមពាក់កណ្តាលខែកញ្ញា ឆ្នាំ ២០២៥ មានចំនួនជិត ១៧៩ ពាន់លានដុង ស្មើនឹង ៤២,៩២% នៃផែនការ។
តាមរយៈនោះ ខេត្តវិនិយោគសាងសង់ ធ្វើឱ្យប្រសើរឡើង បើកទូលាយផ្លូវ ស្ពានអន្តរឃុំ អន្តរភូមិ ជួសជុលប្រព័ន្ធប្រឡាយ ស្ថានីយ៍បូមទឹកបម្រើផលិតកម្មកសិកម្ម សាងសង់ថ្មី និងជួសជុលសំណង់បម្រើការអប់រំ ថែទាំសុខភាពសហគមន៍ ឧបត្ថម្ភគំរូផលិតកម្មកសិកម្មប្រកបដោយប្រសិទ្ធភាព ផ្តល់ការបណ្តុះបណ្តាលវិជ្ជាជីវៈ និងផ្ទេរបច្ចេកទេសដើម្បីជួយកសិករបង្កើនសមត្ថភាពផលិតកម្ម ទទួលបានបច្ចេកវិទ្យាថ្មីៗ លើកកម្ពស់ជីវភាពរស់នៅ និងបរិស្ថានជនបទ... លើកកម្ពស់គុណភាពនៃឃុំជនបទថ្មី។
បន្ទាប់មក ខេត្ត អានយ៉ាង បច្ចុប្បន្នមានគ្រួសារក្រីក្រចំនួន ១២.៧៣៦ គ្រួសារ (អត្រា ១,២៧%) គ្រួសារជិតបន្ទាត់ភាពក្រីក្រចំនួន ២៤.៦៨៧ គ្រួសារ (អត្រា ២,៤៦%)។ ខេត្តបានចំណាយថវិកាជាង ៣១,៦ ពាន់លានដុងដើម្បីអនុវត្តកម្មវិធីនេះ គិតត្រឹមថ្ងៃទី ១៧ ខែកញ្ញា ឆ្នាំ ២០២៥ សម្រេចបានជាង ៤៦% នៃផែនការ។
ផ្តើមពីប្រភពទុននេះ ខេត្តបានឧបត្ថម្ភពូជ សម្ភារៈ ឧបករណ៍សម្រាប់គ្រួសារក្រីក្រ គ្រួសារជិតបន្ទាត់ភាពក្រីក្រដើម្បីអភិវឌ្ឍផលិតកម្ម លើកកម្ពស់វិស័យកសិកម្ម នេសាទ និងផ្ទេរបច្ចេកទេសជួយកសិករកែលម្អផលិតកម្ម សាងសង់ និងធ្វើឱ្យប្រសើរឡើងនូវការងារចរាចរណ៍ ប្រព័ន្ធធារាសាស្ត្រ អគ្គិសនី និងទឹកស្អាតនៅក្នុងឃុំនៃតំបន់ព្រំដែន ជាពិសេសឧបត្ថម្ភសាងសង់ផ្ទះរឹងមាំ លុបបំបាត់ផ្ទះបណ្ដោះអាសន្ន និងផ្ទះទ្រុឌទ្រោមសម្រាប់គ្រួសារក្រីក្រ ផ្តល់ការបណ្តុះបណ្តាលវិជ្ជាជីវៈ និងបង្កើតការងារធ្វើ ឧបត្ថម្ភធានារ៉ាប់រងសុខភាពសម្រាប់គ្រួសារក្រីក្រ និងថ្លៃសិក្សា សម្ភារៈសិក្សាសម្រាប់សិស្សក្រីក្រ...។
អនុវត្តចលនាប្រលងប្រណាំង "រួមដៃគ្នាលុបបំបាត់ផ្ទះបណ្ដោះអាសន្ន ផ្ទះទ្រុឌទ្រោមទូទាំងប្រទេស" ខេត្តបានបញ្ចប់ការឧបត្ថម្ភផ្ទះចំនួន ៩.០៨២ ខ្នងសម្រាប់គ្រួសារស្ថិតក្នុងស្ថានភាពលំបាកលំបិន។ ក្នុងនោះ ផ្ទះសង់ថ្មីចំនួន ៧.១៨៥ ខ្នងត្រូវបានសាងសង់ និងផ្ទះជួសជុលចំនួន ១.៨៩៧ ខ្នង ដោយចំណាយសរុបជិត ៤៩០ ពាន់លានដុងពីថវិការដ្ឋ និងប្រភពសង្គម។ លើសពីនេះ គណៈកម្មាធិការដឹកនាំគ្រប់លំដាប់ថ្នាក់បានប្រើប្រាស់ពេលវេលាជាង ២៦.៣២០ ថ្ងៃធ្វើការដើម្បីឧបត្ថម្ភដល់ការលុបបំបាត់ផ្ទះបណ្ដោះអាសន្ន ផ្ទះទ្រុឌទ្រោមនៅក្នុងតំបន់។
ថ្នាក់ដឹកនាំខេត្ត អានយ៉ាង បានសង្កត់ធ្ងន់ថា៖ ការបញ្ចប់កម្មវិធីលុបបំបាត់ផ្ទះបណ្ដោះអាសន្ន ផ្ទះទ្រុឌទ្រោមនៅក្នុងតំបន់ ជួយគ្រួសារស្ថិតក្នុងស្ថានភាពលំបាកលំបិនឱ្យមានលំនៅដ្ឋាន បង្ហាញពីការយកចិត្តទុកដាក់ និងគិតគូររបស់បក្ស រដ្ឋ និងអាជ្ញាធរមូលដ្ឋានចំពោះប្រជាជន។ ពីទីនោះ គ្រួសារក្រីក្រ និងជិតបន្ទាត់ភាពក្រីក្រមានលំនៅដ្ឋានរឹងមាំ ហើយមានសុវត្ថិភាព ជាពិសេសក្នុងរដូវវស្សា រដូវព្យុះ ដោយ “តាំងលំនៅ” បង្កើតការលើកទឹកចិត្តឱ្យឈោងឈានឡើង កែលម្អជីវិតរបស់ពួកគាត់ រួមចំណែកដល់គោលដៅកាត់បន្ថយភាពក្រីក្រប្រកបដោយចីរភាព និងផ្សព្វផ្សាយស្មារតីនៃសេចក្តីស្រឡាញ់គ្នាទៅវិញទៅមកជាមួយនឹងអត្ថន័យមនុស្សសាស្រ្តយ៉ាងជ្រាលជ្រៅ “មិនទុកចោលនរណាម្នាក់នៅខាងក្រោយឡើយ”។
ទន្ទឹមនឹងនោះ ចំពោះកម្មវិធីគោលដៅជាតិស្តីពីការអភិវឌ្ឍសេដ្ឋកិច្ច-សង្គមនៅតំបន់ជនជាតិភាគតិច និងតំបន់ភ្នំ ខេត្តបានរៀបចំផែនការដើម្បីដាក់ដំណើរការ រៀបចំការអនុវត្តគម្រោង អនុគម្រោងឱ្យបានទាន់ពេលវេលា ជូនជនជាតិភាគតិចក្នុងតំបន់យ៉ាងឆាប់រហ័ស ជាពិសេសការផ្តល់អាទិភាពធនធានពីថវិការដ្ឋសម្រាប់ការវិនិយោគនៅក្នុងឃុំ ភូមិនៅជួបការលំបាកខ្លាំង។
យ៉ាងណាក៏ដោយ យោងតាមមន្ទីរហិរញ្ញវត្ថុខេត្ត អានយ៉ាង ការអនុវត្តកម្មវិធីគោលដៅជាតិទាំង ៣ របស់ខេត្តកំពុងប្រឈមមុខនឹងការលំបាកជាច្រើន ដោយសារតែយន្តការ គោលនយោបាយណែនាំការអនុវត្តកម្មវិធីមិនស៊ីចង្វាក់គ្នា មិនសមស្របនឹងការពិត ហើយត្រូវបានផ្លាស់ប្តូរ កែតម្រូវ និងបំពេញបន្ថែមជាញឹកញាប់។ ម្យ៉ាងវិញទៀត ដោយសារតែការអនុវត្តរដ្ឋាភិបាលមូលដ្ឋាន ២ កម្រិត ប្រគល់ការងារ ទទួលការងារ និងការផ្តល់មូលនិធិនៃកម្មវិធីទាំង ៣ ទៅកម្រិតឃុំសម្រាប់ការគ្រប់គ្រង និងមូលដ្ឋាននៅតែប្រឈមមុខនឹងការលំបាកជាច្រើន។ ការបែងចែកប្រភពទុនបុព្វហេតុមានភាពយឺតយ៉ាវ...
ក្នុងរយៈពេល ៥ ឆ្នាំខាងមុខ (២០២៦ - ២០៣០) ខេត្ត អានយ៉ាង មានគោលបំណងបញ្ចប់ ១០០% នៃឃុំត្រូវបានទទួលស្គាល់ថាសម្រេចបានស្តង់ដារជនបទថ្មី។ អត្រាភាពក្រីក្រពហុទិសរក្សាបាននូវការថយចុះជាមធ្យម ០,៣ - ០,៥% ក្នុងមួយឆ្នាំ។ ដូច្នេះ ខេត្តផ្តោតលើការអនុវត្តកម្មវិធីគោលដៅជាតិចំនួន ៣ មានប្រសិទ្ធភាព រួមចំណែកដល់យុទ្ធសាស្ត្រអភិវឌ្ឍន៍សេដ្ឋកិច្ច-សង្គមក្នុងតំបន់ ដោយមានគោលដៅកំណើនផលិតផលក្នុងស្រុកសរុបជាមធ្យម ៥ ឆ្នាំ ១១% ឬច្រើនជាងនេះ។
ថ្នាក់ដឹកនាំខេត្ត អានយ៉ាង បានឲ្យដឹងថា ដើម្បីអនុវត្តកម្មវិធីគោលដៅជាតិទាំងបីដំណាក់កាល ២០២៦-២០៣០ ប្រកបដោយប្រសិទ្ធភាព ខេត្តផ្តោតលើការកៀរគរ និងបែងចែកធនធានដោយសមហេតុផល ការធ្វើសមាហរណកម្មជាមួយគោលនយោបាយពាក់ព័ន្ធ និងលើកកម្ពស់តួនាទីរបស់សហគមន៍ ដោយមានគោលបំណងបង្កើតភាពលេចធ្លោក្នុងការអភិវឌ្ឍសេដ្ឋកិច្ច-សង្គម។
តាមរយៈនោះ ខេត្ត អានយ៉ាង បានរៀបចំផែនការ និងបែងចែកធនធានប្រកបដោយសមហេតុផល ផ្តល់អាទិភាពដល់ការវិនិយោគនៅក្នុងឃុំលំបាកលំបិនខ្លាំង តំបន់ព្រំដែន តំបន់ជនជាតិភាគតិច។ បង្កើនការកៀរគរប្រភពទុនក្រៅថវិកាជាតិ ជាពិសេសពីអាជីវកម្ម និងសហគមន៍ រួមផ្សំជាមួយថវិការដ្ឋ ដើម្បីអនុវត្តកម្មវិធី។ ខេត្តរួមបញ្ចូលនូវកម្មវិធីគោលដៅជាតិជាមួយនឹងគម្រោងអភិវឌ្ឍសេដ្ឋកិច្ចក្នុងស្រុកដូចជា៖ ទេសចរណ៍អេកូឡូស៊ី កសិកម្មបច្ចេកវិទ្យាខ្ពស់ - ជលវប្បកម្ម សេដ្ឋកិច្ចពាណិជ្ជកម្មព្រំដែន សេដ្ឋកិច្ចសមុទ្រ...។
ទន្ទឹមនឹងនោះ ខេត្តបានរៀបចំការបណ្តុះបណ្តាលយ៉ាងយកចិត្តទុកដាក់សម្រាប់មន្ត្រីថ្នាក់ឃុំ ស្តីពីការគ្រប់គ្រងគម្រោង ការត្រួតពិនិត្យសហគមន៍ ការអនុវត្តបច្ចេកវិទ្យាព័ត៌មានក្នុងការគ្រប់គ្រង ការត្រួតពិនិត្យវឌ្ឍនភាព និងប្រសិទ្ធភាពវិនិយោគ។ ក្នុងពេលជាមួយគ្នានេះ លើកទឹកចិត្តប្រជាជនឱ្យចូលរួមក្នុងការសាងសង់ ការត្រួតពិនិត្យ និងទទួលបានអត្ថប្រយោជន៍ពីគម្រោងសាងសង់ បង្កើនការទំនាក់ទំនង បង្កើនការយល់ដឹងអំពីសិទ្ធិ និងការទទួលខុសត្រូវក្នុងការអនុវត្តកម្មវិធីគោលដៅជាតិ។
ជាពិសេស ខេត្តអភិវឌ្ឍតំបន់ព្រំដែន និងជនជាតិភាគតិចប្រកបដោយចីរភាព ដោយទាញយកអត្ថប្រយោជន៍ពីទីតាំងភូមិសាស្ត្ររបស់ខ្លួនមានព្រំប្រទល់ជាប់នឹងព្រះរាជាណាចក្រកម្ពុជា ដើម្បីអភិវឌ្ឍពាណិជ្ជកម្មព្រំដែន ទេសចរណ៍ វប្បធម៌ជាដើម។ កសាងតំបន់ជនបទថ្មីជឿនលឿន ផ្សារភ្ជាប់ជាមួយនឹងធ្វើបរិវត្តកម្មឌីជីថល អភិវឌ្ឍកសិកម្មឆ្លាតវៃ និង បង្កើនប្រាក់ចំណូលរបស់ប្រជាជន។
អត្ថបទនិងរូបថត៖ ឡេ ហ្វីហាយ
ប្រែសម្រួល៖ សឺន ហេង
