នៅមុនថ្ងៃចូលឆ្នាំថ្មីប្រពៃណី បងប្អូនជនជាតិ ខ្មែរ ប្រញាប់ប្រញាលរៀបចំទុកដាក់ សម្អាតផ្ទះសម្បែងដោយមានជំនឿថានឹងលាងសម្អាតអពមង្គលនៃឆ្នាំចាស់ ត្រៀមរៀបចំទទួលទេវតាឆ្នាំថ្មី ត្រូវបានភ្ជាប់ទៅនឹងទេវកថាទាក់ទងសិរី ៣ ប្រការរបស់មនុស្ស។
លោកអាចារ្យ ឡឹម ង៉ុកថាញ់ វត្តពោធិវង្ស (សង្កាត់ បៃហៀន ទីក្រុង ហូជីមិញ) បានឲ្យដឹងថា ឆ្នាំនេះពិធីបុណ្យចូលឆ្នាំប្រពៃណីរបស់ជនជាតិ ខ្មែរ នឹងប្រព្រឹត្តទៅរយៈពេលបីថ្ងៃសំខាន់ៗ គឺចាប់ពីថ្ងៃទី១៤ ដល់ថ្ងៃទី១៦ ខែមេសា ថ្ងៃដំបូងជាមហាសង្ក្រាន្ត ថ្ងៃទីពីរជាវារៈវ័នបត និងថ្ងៃទីបីជាវារៈឡើងស័ក។
ខណៈពេលផ្ទេររវាងឆ្នាំចាស់ និងឆ្នាំថ្មីត្រូវបានកំណត់ខែ ថ្ងៃ ម៉ោង និងនាទីនៅពេលអង្គទេវតាឆ្នាំថ្មីយាងចុះមកគ្រប់គ្រងជំនួសអង្គទេវតាឆ្នាំចាស់ បានកំណត់ដោយក្បួនហោរាសាស្ត្របុរាណ ហៅថាក្បួនមហាសង្ក្រាន្ត។
យោងតាមលោកអាចារ្យ ង៉ុកថាញ់ បុណ្យចូលឆ្នាំប្រពៃណីខ្មែរមានអត្ថន័យជ្រាលជ្រៅជាពិសេស មិនត្រឹមតែជាពេលវេលាផ្ទេរឆ្នាំចាស់ផ្លាស់ឆ្នាំថ្មីប៉ុណ្ណោះទេ ថែមទាំងត្រូវបានផ្សារភ្ជាប់ជាមួយនឹងសកម្មភាពវប្បធម៌ ជំនឿជាច្រើនដូចជា ពូនភ្នំខ្សាច់ បង្សុកូល សម្តែងព្រះបរិត សម្តែងធម៌ទេសនាអំពីអត្ថន័យនៃបុណ្យចូលឆ្នាំប្រពៃណី មានដាក់បាត ស្រង់ទឹកព្រះពុទ្ធរូប ងូតទឹកជូនជីដូនជីតា មាតាបិតា ស្របពេលក៏ត្រៀមរៀបចំទេយ្យវត្ថុយកទៅ វត្ត សុំពរជ័យ សំណាងល្អ។
ឱកាសនេះ បងប្អូនជនជាតិក៏បានជូនអំណោយដល់ឪពុកម្តាយ និងអ្នកមានគុណទាំងឡាយដែលចិញ្ចឹមបីបាច់ថែរក្សា ឆ្លងតាមរយៈនោះបង្ហាញយ៉ាងច្បាស់ពីការគោរពដឹងគុណ សន្សំកុសលបង្កើតជាលំហវប្បធម៌ពិសេសមួយសម្បូរទៅដោយតម្លៃមនុស្សសាស្ត្រ និងរួមចំណែកដល់ការអភិរក្ស និងលើកកម្ពស់អត្តសញ្ញាណវប្បធម៌ប្រពៃណីរបស់ប្រជាជាតិ។
“ជារៀងរាល់ឆ្នាំឲ្យតែដល់ឱកាសបុណ្យចូលឆ្នាំថ្មី គ្រួសារខ្ញុំក្រៅពីសម្អាត តុបតែងផ្ទះសម្បែងស្អាតស្អំនៅថែមទាំងត្រៀមរៀបចំរណ្តាប់សក្ការៈថ្វាយទេវតាឆ្នាំថ្មីនៅថ្ងៃមហាសង្ក្រាន្ត។ អាសនៈត្រូវបានដាក់នៅមុខផ្ទះមួយកន្លែង ហើយរណ្តាប់សក្ការៈបូជារួមមាន ទៀនមួយគូ ធូបប្រាំដើម ទឹកអប់មួយដប ផ្កាស្រស់ពីរថូ ផ្លែឈើ នំនេកនិងភេសជ្ជៈផងដែរ។ ក្នុងឱកាសនេះ ក៏ត្រៀមរៀបចំសម្លៀកបំពាក់ថ្មីសម្រាប់សមាជិកគ្រួសារ និងរួមគ្នានាំយកទេយ្យវត្ថុទៅវត្តដើម្បីប្រគេនព្រះសង្ឃសូត្រមន្តកម្ចាត់អពមង្គលឆ្នាំចាស់ ហើយសុំ ពរជ័យឆ្នាំថ្មី” លោកគ្រូអាចារ្យ ង៉ុកថាញ់ ចែករំលែក។
ក្នុងឱកាសនេះ គណៈកម្មការនៃកម្មវិធីនៅតាមភូមិ ស្រុកបងប្អូនជនជាតិ ខ្មែរ អនុវត្តសកម្មភាពវប្បធម៌ ល្បែងប្រជាប្រិយជាច្រើន ព្រមទាំងកម្មវិធីសិល្បៈដ៏វិសេសវិសាល រួមចំណែកពង្រឹងចំណងមិត្តភាពសហគមន៍ បង្កើតបរិយាកាសសប្បាយរីករាយ។
បណ្តាល្បែងប្រជាប្រិយដូចជា បោះអង្គញ់ ទាញព្រ័ត្រ លោតបាវ បិទភ្នែកវាយឆ្នាំងដីជាដើម តែងតែរៀបចំឡើងនៅក្នុងទីធ្លាវត្ត ឬទីធ្លាខាងមុខផ្ទះ។ សកម្មភាពទាំងនេះមិនត្រឹមតែជួយប្រជាជនកម្សាន្តសប្បាយបន្ទាប់ពីពលកម្មនឿយហត់ទុក្ខលំពេលមួយឆ្នាំប៉ុណ្ណោះទេ ថែមទាំងរួមចំណែកដល់ការអភិរក្ស លើកកម្ពស់តម្លៃវប្បធម៌ប្រពៃណីទៀតផង។
ល្បែងនីមួយៗមានអត្ថន័យដោយឡែកៗ។ តួយ៉ាងល្បែងទាញព្រ័ត្រលើកជ្រោងលើសាមគ្គីភាពរួម។ ប្រសិនបើសមាជិកម្នាក់ខ្វះការខិតខំប្រឹងប្រែង ឬសហការមិនហ្មត់ចត់ ក្រុមទាំងមូលអាចប្រឈមក្នុងស្ថានភាពមិនអំណោយផល ហើយបរាជ័យ។ លើសពីនេះ ប្រជាជន ខ្មែរ រៀបចំការសម្តែងសិល្បៈវប្បធម៌ប្រពៃណីជាច្រើនដូចជា រាំវង់ រាំរបាំ ល្ខោនយូរកេរ បង្កើនជីវភាពខាងវិញ្ញាណ បង្កបរិយាកាសបុណ្យកាន់តែអឹកធិក ពោរពេញដោយអត្តសញ្ញាណប្រជាជាតិ ព្រមទាំងពង្រឹងសាមគ្គីភាពសហគមន៍ផងដែរ។
ដើម្បីធានាពិធីបុណ្យប្រព្រឹត្តទៅក្នុងបរិយាកាសនៃសាមគ្គីភាព សេចក្តីរីករាយ និងសុខុមាលភាព សមាគមព្រះសង្ឃសាមគ្គីស្នេហាជាតិទីក្រុង កឹនធើ បានចេញលិខិតណែនាំវត្តអារាមពុទ្ធសាសនាទក្ខិណនិកាយ ខ្មែរ នៅមូលដ្ឋានឲ្យរៀបចំពិធីបុណ្យចូលឆ្នាំថ្មីសមស្រប សន្សំសំចៃ ពោរពេញទៅដោយអត្តសញ្ញាណវប្បធម៌។
ព្រះឧបជ្ឈាយ៍ តាំងណូ ប្រធានសមាគមព្រះសង្ឃសាមគ្គីស្នេហាជាតិទីក្រុង កឹនធើ ស្នើឱ្យព្រះចៅអធិការ គណកម្មការ អាចារ្យ និងអ្នកមានប្រជាប្រិយភាពនៅតាមវត្តអារាម ភូមិស្រុកបង្កើតផែនការរៀបចំពិធីកិច្ចសាសនាស្របតាមគន្លងធម៌ តាមប្រពៃណី និងបទប្បញ្ញត្តិច្បាប់។
“ជាពិសេស កុំរៀបចំ កុំចូលរួមសកម្មភាពបង្កគ្រោះថ្នាក់កើតមាន ទាស់អារម្មណ៍ដូចជាការប៉ាតម្សៅ ការគប់ម្សៅ ការបាញ់ទឹក... សមាគមចាត់ទុកទាំងនេះជាអាកប្បកិរិយាមិនសមរម្យ ធ្វើឱ្យប៉ះពាល់ដល់សោភ័ណភាព ប៉ះពាល់ដល់សហគមន៍ បង្កហានិភ័យដល់សន្តិសុខ និងសណ្តាប់ធ្នាប់ និងធ្វើឱ្យខូចតម្លៃវប្បធម៌ប្រពៃណីរបស់បងប្អូនជនជាតិខ្មែរ”។
ប៉ុន្មានថ្ងៃកន្លងមកនេះ ក្រសួង ស្ថាប័ន អង្គការមហាជនចាប់ពីថ្នាក់មជ្ឈិមដល់មូលដ្ឋាន បានរៀបចំដំណើរទស្សនកិច្ច សួរសុខទុក្ខជូនពរអំណរឆ្នាំថ្មីនៃសហគមន៍បងប្អូនជនជាតិខ្មែរ។ ជាពិសេស លោកនាយករដ្ឋមន្ត្រី ឡេ មិញហ៊ឹង បានផ្ញើលិខិតអបអរសាទរជនរួមជាតិខ្មែរ សមមិត្ត និងព្រះសង្ឃខ្មែរ ប្រកបដោយមនោសញ្ចេតនាស្និទ្ធស្នាល ផ្ញើវាចាសួរសុខទុក្ខយ៉ាងកក់ក្តៅដោយស្មោះអស់ពីចិត្ត អំណរបុណ្យចូលឆ្នាំថ្មីដ៏ល្អប្រពៃបំផុត។
លោកនាយករដ្ឋមន្ត្រីសង្កត់ធ្ងន់ថា គ្រប់លំដាប់ថ្នាក់ គ្រប់វិស័យ និងគ្រប់មូលដ្ឋានបន្តអនុវត្តគោលការណ៍ គោលនយោបាយរបស់បក្ស និងរដ្ឋ ផ្តោតសំខាន់លើសារាចរណែនាំលេខ 19-CT/TW ចុះថ្ងៃទី ១០ ខែមករា ឆ្នាំ ២០១៨ របស់គណៈកម្មាធិការបក្សស្តីពីការពង្រឹងការងារនៅតំបន់បងប្អូនជនជាតិ ខ្មែរ ក្នុងស្ថានភាពថ្មី។
ក្នុងឱកាសនេះ គណៈប្រតិភូនៃក្រុមប្រឹក្សាជនជាតិនៃរដ្ឋសភាដឹកនាំដោយសមមិត្ត ឡឹម វ៉ាន់ ម៉ឹន សមាជិកគណៈកម្មាធិការបក្ស សមាជិកគណៈកម្មាធិការអចិន្ត្រៃយ៍នៃរដ្ឋសភា ប្រធានក្រុមប្រឹក្សាជនជាតិធើ្វប្រធានគណៈប្រតិភូបានទៅសួរសុខទុក្ខ ជូនពរអំណរបុណ្យចូលឆ្នាំថ្មីនៅបណ្តាខេត្ត ក្រុង។
នៅបណ្តាកន្លែងអញ្ជើញទស្សនកិច្ចរបស់លោក ឡឹម វ៉ាន់ម៉ឹន បានកត់សម្គាល់ លើកសរសើរចំពោះការរួមចំណែកវិជ្ជមានរបស់ព្រះសង្ឃ គណៈកម្មការវត្តរួមជាមួយប្រជាជនខ្មែរ ក្នុងការថែរក្សាអត្តសញ្ញាណវប្បធម៌ជាតិ ការលើកកម្ពស់សាមគ្គី និងការប្រតិបត្តិល្អនូវគោលការណ៍របស់បក្ស គោលនយោបាយ និងច្បាប់របស់រដ្ឋ ឆ្លងតាមរយៈនោះរួមចំណែកដល់ការលើកកម្ពស់ការអភិវឌ្ឍសេដ្ឋកិច្ច-សង្គម និងការរក្សាសន្តិសុខ សណ្តាប់ធ្នាប់នៅមូលដ្ឋាន។
បរិយាកាសដ៏អ៊ូរអរនៃពិធីបុណ្យចូលឆ្នាំថ្មីប្រពៃណីឆ្នាំ ២០២៦ ប្រជាជនខ្មែរនៅភាគខាងត្បូងនៃវៀតណាមកាន់តែរួបរួម សាមគ្គីកសាងមាតុភូមិស្រុកទេសអភិវឌ្ឍ វិបុលភាព និងអរិយធម៌ជាងមុន។ នេះមិនត្រឹមតែជាពេលវេលាសម្រាប់ការជួបជុំគ្រួសារប៉ុណ្ណោះទេ ថែមទាំងជាចំណុចលេចធ្លោខាងវប្បធម៌ដ៏ពិសេស រួមចំណែកធ្វើឲ្យពិពិធកម្មនៃសហគមន៍បណ្តាជនជាតិវៀតណាមផងដែរ៕
ផលិតដោយ៖ សឺន ហេង
