នេះគឺជាលើកដំបូង ផ្នែកសុខាភិបាល កឹនធើ អនុវត្តគំរូពិនិត្យសុខភាពឥតគិតថ្លៃភ្ជាប់ជាមួយនឹងធ្វើបញ្ជីសុខភាពអេឡិចត្រូនិចប្រកបដោយសង្គតិភាព ស្របតាមទិសដៅឆ្ពោះទៅរកការថែទាំសុខភាពប្រជាជនទាំងមូលរបស់រដ្ឋាភិបាល។
សកម្មភាពនេះត្រូវបានរៀបចំឡើងនៅមូលដ្ឋានទាំង ៤ គឺ៖ ឃុំ តឹនហ្វា ឃុំ ឡុងភូ ឃុំ ញើនអាយ និងសង្កាត់ ឡុងប៊ិញ។ កម្មវិធីសំដៅសាកល្បងពិនិត្យសុខភាពតាមកាលកំណត់ ពិនិត្យសុខភាពជម្រើសឥតគិតថ្លៃជូនប្រជាជន ដើម្បីសកម្មក្នុងការរកឃើញ បង្ការ និងព្យាបាលជំងឺឱ្យបានឆាប់ ព្រមទាំងធ្វើបច្ចុប្បន្នភាពទិន្នន័យទៅក្នុងមូលដ្ឋានទិន្នន័យគ្រប់គ្រងសុខភាពជាតិ។
លោកស្រី ង្វៀន ធីង៉ុកយីប អនុប្រធានគណៈកម្មាធិការប្រជាជនទីក្រុងមានប្រសាសន៍ថា៖ នេះត្រូវបានចាត់ទុកជាព្រឹត្តិការណ៍ដ៏សំខាន់មួយរបស់ផ្នែកសុខាភិបាលទីក្រុងខណៈពេលនេះជាលើកដំបូងបង្អស់អនុវត្តគំរូគ្រប់គ្រងសុខភាពប្រជាជនទាំងមូលតាមទិសដៅតភ្ជាប់ទិន្នន័យឌីជីថល រួមបញ្ចូលឯកសារសុខភាពអេឡិចត្រូនិចនៅក្នុងកម្មវិធី VNeID។
សកម្មភាពនេះក៏ជាជំហានធ្វើឱ្យជាក់ស្តែងនូវសារាចររបស់នាយករដ្ឋមន្ត្រីនៃរដ្ឋាភិបាលស្តីពីការរៀបចំពិនិត្យសុខភាពតាមកាលកំណត់ ឬពិនិត្យសុខភាពជម្រើសឥតគិតថ្លៃជូនប្រជាជន ទន្ទឹមនោះអនុវត្តសេចក្តីសម្រេចចិត្តលេខ 72-NQ/TW របស់ការិយាល័យនយោបាយស្តីពីការពង្រឹងការការពារ ការថែទាំ និងលើកកម្ពស់សុខភាពប្រជាជនបន្ថែម។
លោក ហ្វាង ក្វឹកកឿង នាយកមន្ទីរសុខាភិបាលផ្តល់ព័ត៌មានថា៖ ផ្នែកសុខាភិបាលទីក្រុងកំណត់នេះមិនមែនគ្រាន់តែជាសកម្មភាពពិនិត្យព្យាបាលជំងឺធម្មតាប៉ុននោះទេ ថែមទាំងជាជំហានផ្លាស់ប្តូរក្នុងគំនិតថែទាំសុខភាពពីបាត់ម្ចាស់ការទៅជាម្ចាស់ការវិញ យកការបង្ការជំងឺនិងគ្រប់គ្រងសុខភាពសហគមន៍ធ្វើជាចំណុចស្នូល។ ឆ្លងតាមរយៈការពិនិត្យ ផ្នែកសុខាភិបាលអាចឆាប់រកឃើញបណ្តាជំងឺមិនចម្លងមេរោគ ជំងឺរ៉ាំរ៉ៃ តាមរយៈនោះផ្តល់ការពិគ្រោះយោបល់ព្យាបាលទាន់ពេលវេលា កាត់បន្ថយថ្លៃសេវាពេទ្យ និងបន្ធូរបន្ថយបន្ទុកធ្ងន់ឱ្យប្រព័ន្ធព្យាបាល។
គួរឱ្យចាប់អារម្មណ៍ក្នុងផែនការលើកនេះគឺការចូលរួមព្រមៗ គ្នារបស់ផ្នែក លំដាប់ថ្នាក់នានា។ ក្រៅពីផ្នែកសុខាភិបាល អង្គភាពនានាដូចជា នគរបាលទីក្រុង មន្ទីរអប់រំ និងបណ្តុះបណ្តាល មន្ទីរវិទ្យាសាស្ត្រ និងបច្ចេកវិទ្យា ធានារ៉ាប់រងសង្គមទីក្រុងរួមជាមួយនឹងអង្គការមហាជនផ្សេងៗ នឹងសហការអនុវត្តចាប់ពីកិច្ចការផ្សព្វផ្សាយ ពិនិត្យពិច័យមុខសញ្ញាមកជួយធ្វើបច្ចុប្បន្នភាពទិន្នន័យឌីជីថលឡើងវិញ និងធានាសុវត្ថិភាពព័ត៌មាន។
ដើម្បីបង្កលក្ខណៈងាយស្រួលជូនប្រជាជន ទីក្រុង កឹនធើ រៀបចំពិនិត្យសុខភាពជាច្រើនទម្រង់រូបភាពដែលមានភាពបត់បែនដូចជាការពិនិត្យនៅមូលដ្ឋានសុខាភិបាល ពិនិត្យចល័តនៅក្នុង សហគមន៍ សាលារៀន សហគ្រាស ឬក៏នៅតាមចំណុចប្រជានិវេសន៍។ ក្នុងករណីស្ថានីយ៍សុខភាពកម្រិតឃុំមិនទាន់គ្រប់លក្ខខណ្ឌឯកទេស មន្ទីរពេទ្យ និងមន្ទីរសុខាភិបាលខ្សែលើនឹងផ្តល់បុគ្គលិក ឯកទេស និងគ្រឿងបរិក្ខារពេទ្យដើម្បីរៀបចំការពិនិត្យចល័ត។
ការដែលកឹនធើ ក្លាយជាមូលដ្ឋានមួយក្នុងចំណោមមូលដ្ឋានឆាប់អនុវត្តគំរូពិនិត្យសុខភាពដោយឥតគិតថ្លៃរួមផ្សំជាមួយនឹងការធ្វើបញ្ជីសុខភាពអេឡិចត្រូនិចជូនប្រជាជនទាំងមូលត្រូវបានវាយតម្លៃថាមានសារៈសំខាន់នៅក្នុងដំណើរការកសាងគ្រឹះសុខាភិបាលបង្ការលក្ខណៈទំនើប ជំរុញបរិវត្តកម្មឌីជីថលនៅក្នុងផ្នែកសុខាភិបាល និងធ្វើឲ្យក្លាយទៅជាភាពជាក់ស្តែងគោលដៅថែទាំសុខភាពប្រជាជនទាំងមូល ស្របតាមស្មារតីបញ្ជាណែនាំរបស់រដ្ឋាភិបាល។
ឆ្លងតាមរយៈនោះ ប្រជាជនមិនត្រឹមតែទទួលបានសេវាថែទាំសុខភាពកាន់តែលឿន ងាយស្រួលជាងមុនប៉ុននោះទេ ថែមទាំងបង្កើតនូវទម្លាប់ម្ចាស់ការគ្រប់គ្រងសុខភាពផ្ទាល់ខ្លួននៅក្នុងបរិស្ថានឌីជីថលទៀតផង៕
អត្ថបទ៖ អាញ់ត្វៀត
ប្រែសម្រួល៖ អៀងថាន់
