ចំណុចសំខាន់នៃកិច្ចប្រជុំនេះគឺវាយតម្លៃស្ថានភាពជាក់ស្តែង ស្នើវិធានការធានាធនធានមនុស្ស និងលើកកម្ពស់គុណភាពនៃប្រតិបត្តិការរបស់ស្ថានីយសុខាភិបាលថ្នាក់ឃុំក្រោយពីអនុវត្តគំរូអាជ្ញាធរមូលដ្ឋានពីរថ្នាក់។
អញ្ជើញថ្លែងសុន្ទរកថានៅក្នុងកិច្ចប្រជុំការងារ លោកស្រី ត្រឹន ធីញីហា អនុប្រធានទទួលបន្ទុកនៃគណៈកម្មាធិការបំណងប្រជាជន និងត្រួតពិនិត្យផ្ទៀងផ្ទាត់វាយតម្លៃថា យ៉ាឡាយ បានម្ចាស់ការចេញយន្តការ គោលនយោបាយជាច្រើនដោះស្រាយការលំបាកសម្រាប់វិស័យសុខាភិបាល។ គណៈប្រតិភូត្រួតពិនិត្យស្នើឱ្យខេត្តបន្ត ដោះស្រាយស្ថានភាពខ្វះខាតធនធានមនុស្ស លើកកម្ពស់គុណភាពប្រតិបត្តិការរបស់ស្ថានីយសុខាភិបាល ជាពិសេសនៅតំបន់ជ្រៅ តំបន់ឆ្ងាយ ផ្តោតលើការបណ្តុះបណ្តាលធនធានមនុស្សនៅផ្ទាល់កន្លែងជាកូនក្មួយបងប្អូនជនជាតិភាគតិច ពង្រីកប្រសិទ្ធភាពនៃគំរូប្តូរវេនវេជ្ជបណ្ឌិត ពិនិត្យ ព្យាបាលជំងឺពីចម្ងាយ និងបង្កើន សហការជាមួយនឹងកងកម្លាំងពេទ្យយោធា នគរបាល កងទ័ពការពារព្រំដែនក្នុងការថែទាំសុខភាពប្រជាជន។ ស្របពេលនោះ ខេត្តចាំបាច់ម្ចាស់ការអនុវត្តផែនទីបង្ហាញផ្លូវប្តូរពីស្ថានីយសុខាភិបាលទៅជាអង្គភាពសេវាសាធារណៈ។
យោងតាមគណៈកម្មាធិការប្រជាជនខេត្ត យ៉ាឡាយ ក្រោយពីរៀបចំអង្គភាពរដ្ឋបាលរួចស្រេច ខេត្តទាំងមូលមាន ស្ថានីយសុខាភិបាលចំនួន ១៣៥ ចំណុចសុខាភិបាលចំនួន ៣៦៩។ ចំនួនប្រជាជនត្រូវបានបម្រើរបស់ស្ថានីយនីមួយៗ កើនឡើងប្រហែលពី ៩.៧០០ នាក់ដល់ជិត ២៦.៩០០ នាក់។ ភូមិសាស្រ្តក្រោមការគ្រប់គ្រងកាន់តែធំទូលាយ ហើយបន្ទុកការងារក៏កើនឡើងគួរឱ្យកត់សម្គាល់ដែរ។ ក្រៅពីភារកិច្ចពិនិត្យ ព្យាបាលជំងឺបឋម ស្ថានីយសុខាភិបាលក៏អនុវត្តការបង្ការ ទប់ស្កាត់ជំងឺរាតត្បាត ចាក់ថ្នាំបង្ការរោគ គ្រប់គ្រងជំងឺមិនឆ្លងរាលដាល ចំនួនប្រជាជន សុវត្ថិភាពចំណីអាហារ បរិវត្តកម្មឌីជីថល និងគ្រប់គ្រងសុខភាពប្រជាជន។
ខណៈពេលនោះ នាបច្ចុប្បន្នខេត្តទាំងមូលមានបុគ្គលិកសុខាភិបាលខ្សែរយៈឃុំចំនួន ២.៣៤៦ នាក់ សម្រេចប្រហែល ៨២,៦% ក្របខណ្ឌបានប្រគល់ឲ្យ នៅខ្វះ ៤៩៤ នាក់។ មានចំនួន ១១២ ក្នុងចំំណោមទាំង ១៣៥ ស្ថានីយសុខាភិបាលខ្វះធនធានមនុស្ស ចំនួន ៣១ ស្ថានីយមានវេជ្ជបណ្ឌិតតែម្នាក់គត់ និង ៤ ស្ថានីយមិនទាន់មានវេជ្ជបណ្ឌិតជាប់កិច្ចសន្យា ត្រូវចាត់ចែងវេជ្ជបណ្ឌិតប្តូរវេនពីខ្សែរយៈលើមកជួយ។ ក្រៅពីនោះ ផ្នែកសុខាភិបាលនៅខ្វះថ្នាក់ដឹកនាំគ្រប់គ្រងប្រហែល ៥០% ដោយឡែកខ្សែរយៈឃុំនៅខ្វះថ្នាក់ដឹកនាំនៅស្ថានីយសុខាភិបាលប្រហែល ២០%។
យោងតាមលោកស្រី ង្វៀន ធីថាញ់លិច អនុប្រធានគណៈកម្មាធិការប្រជាជនខេត្ត មានប្រសាសន៍ថា៖ យ៉ាឡាយ បានបង្កើតគម្រោងអភិវឌ្ឍន៍សុខាភិបាលលក្ខណៈពិសេសដាច់ដោយឡែក តម្រង់ទិសដៅពង្រឹងប្រព័ន្ធស្ថានីយសុខាភិបាល អភិវឌ្ឍមជ្ឈមណ្ឌលសុខាភិបាលពហុមុខងារ បង្កើតមន្ទីរពេទ្យក្នុងតំបន់នៅ អានខេ អាយុនប៉ា ក្រុងប៉ា ឌឹកគើ និង បុងសឺន ព្រមទាំងការលើកកម្ពស់លទ្ធភាពមន្ទីរពេទ្យខ្សែរយៈខេត្ត។ ខេត្តក៏បានស្នើសុំឱ្យរដ្ឋសភា រដ្ឋាភិបាល និងក្រសួងសុខាភិបាលធ្វើឱ្យសុក្រឹតយន្តការ គោលនយោបាយពិសេសដាច់ដោយឡែកក្នុងពេលឆាប់ៗ ដោយផ្តល់អាទិភាពដល់ការវិនិយោគលើហេដ្ឋារចនាសម្ព័ន្ធ បរិក្ខា និងធនធានមនុស្សសម្រាប់មូលដ្ឋានដែលមានភូមិសាស្រ្តធំទូលាយ តំបន់ភ្នំ ព្រំដែននានាក្រោយការរៀបចំអង្គភាពរដ្ឋបាល។
រាយការណ៍ចំពោះគណៈប្រតិភូត្រួតពិនិត្យ លោកស្រី ង្វៀន ធីថាញ់លិច មានប្រសាសន៍ ទោះបីជាមូលដ្ឋានរៀបចំការជ្រើសរើសបុគ្គលិករាល់ឆ្នាំ ដោយប្រើទាំងទម្រង់ពិនិត្យជ្រើសរើសជំនួសឱ្យប្រលងជ្រើសរើសក៏ដោយ ប៉ុន្តែចំនួនឯកសារដាក់ពាក្យចុះឈ្មោះនៅតិចណាស់។ មូលហេតុចម្បងគឺវេជ្ជបណ្ឌិតមិនចង់ធ្វើការនៅតំបន់ជ្រៅ តំបន់ឆ្ងាយទេ ខ្សែសុខាភិបាលមូលដ្ឋានពិបាកទាក់ទាញធនធានមនុស្ស។ ខេត្តបានចេញគោលនយោបាយឧបត្ថម្ភជាច្រើនដូចជា ការទាក់ទាញវេជ្ជបណ្ឌិតនឹងកម្រិតឧបត្ថម្ភរហូតដល់ ៦០០ លានដុង ឧបត្ថម្ភថវិកាជួលលំនៅឋាន លំនៅឋានសង្គម និងការបណ្តុះបណ្តាលធនធានមនុស្សដោយប្រើថវិកាមូលដ្ឋាន ក៏ប៉ុន្តែការជ្រើសរើសនៅតែមិនទាន់សម្រេចតាមតម្រូវការនៅឡើយ។
យោងតាមគណៈកម្មាធិការប្រជាជនខេត្ត ការកាត់បន្ថយចំនួនស្ថានីយសុខាភិបាលមិនមានន័យថាតម្រូវការធនធានមនុស្សថយចុះនោះទេ។ ក្រោយរៀបចំ ស្ថានីយនីមួយៗ ត្រូវគ្រប់គ្រងចំណុចសុខាភិបាលកាន់តែច្រើនថែមទៀត ចំនួនប្រជាជនកាន់តែច្រើន និងទទួលបន្ទុកភារកិច្ចវិជ្ជាជីវៈក៏កាន់តែច្រើនថែមទៀត ក៏ដូចជាការគ្រប់គ្រងរដ្ឋផងដែរ។ ព្រោះហេតុដូច្នេះ ការបញ្ជាក់កម្រិតកំណត់ធនធានមនុស្សដោយផ្អែកលើចំនួនស្ថានីយសុខាភិបាលដូចនាពេលបច្ចុប្បន្ននេះលែងសមស្របជាមួយភាពជាក់ស្តែងទៀតហើយ។
លើសពីនេះ ប្រព័ន្ធសុខាភិបាលមូលដ្ឋាននៅជួបប្រទះនឹងការលំបាកជាច្រើនអំពីហេដ្ឋារចនាសម្ព័ន្ធខណៈពេលមានចំនួន ១០៩ ក្នុងចំណោមទាំង ១៣៥ ស្ថានីយមិនទាន់មានបន្ទប់មុខងារគ្រប់គ្រាន់ មាន ១១៦ ស្ថានីយខ្វះគ្រឿងបរិក្ខារពេទ្យ ចំនួន ១២០ ស្ថានីយមិនទាន់មានគ្រឿងបរិក្ខារធ្វើតេស្ដនិង ១៣៣ ស្ថានីយមិនទាន់មានគ្រឿងបរិក្ខារស្កែនរូបភាពរោគវិនិច្ឆ័យ។ មូលដ្ឋានជាច្រើនក៏មានការអល់អែកក្នុងការរៀបចំក្បាលម៉ាស៊ីនក្រោយពីពេលស្ថានីយសុខាភិបាលផ្ទេរមកឱ្យគណៈកម្មាធិការប្រជាជនឃុំគ្រប់គ្រងវិញ។
មុននោះ ក្នុងកិច្ចប្រជុំ អ្នកបោះឆ្នោតនៅខេត្ត យ៉ាឡាយ បានស្នើសុំយកចិត្តទុកដាក់ដោះស្រាយការលំបាករបស់សុខាភិបាលមូលដ្ឋាន ជាពិសេសគឺស្ថានភាពខ្វះវេជ្ជបណ្ឌិតបំពេញការងារជាប្រចាំនៅស្ថានីយសុខាភិបាលថ្នាក់ឃុំ ខ្វះធនធានមនុស្សមានវិជ្ជាជីវៈបើប្រៀបធៀបទៅនឹងតម្រូវការជាក់ស្តែង លំបាកក្នុងការទាក់ទាញ និងរក្សាបុគ្គលិកសុខាភិបាលនៅតំបន់ភ្នំ តំបន់លំបាក។ អ្នកបោះឆ្នោតក៏បានឆ្លុះបញ្ចាំងពីហេដ្ឋារចនាសម្ព័ន្ធ បរិក្ខារពេទ្យ ថ្នាំពេទ្យ សម្ភារៈវេជ្ជសាស្ត្រ និងហេដ្ឋារចនាសម្ព័ន្ធបច្ចេកវិទ្យាព័ត៌មាននៅតាមស្ថានីយសុខភាពជាច្រើនមិនទាន់គ្រប់គ្រាន់ និងទ្រុឌទ្រោម របបឧបត្ថម្ភមិនសមស្របនឹងបន្ទុកការងារ។ ទន្ទឹមនោះ ស្នើសុំឱ្យក្រសួង ផ្នែកមជ្ឈិមបន្តសម្រេចរួចរាល់យន្តការ គោលនយោបាយ រៀបចំធនធានមនុស្ស ឆាប់លំនឹងគំរូអង្គការ និងប្រតិបត្តិការរបស់ស្ថានីយសុខាភិបាលថ្នាក់ឃុំ រួមចំណែកលើកកម្ពស់គុណភាពថែទាំសុខភាពបឋមជូនប្រជាជន៕
អត្ថបទ និងរូបថត៖ ក្វាងថាយ
ប្រែសម្រួល៖ អៀងថាន់
