លោក ក្លេប (អាយុជាង ៧០ ឆ្នាំប្លាយ) នៅភូមិ តឹនធឿង ៤ ឃុំ ឌិញត្រាងធឿង ខេត្ត ឡឹមដុង មានប្រសាសន៍ថា លោកបានឃើញការផ្លាស់ប្តូរយ៉ាងច្បាស់ក្រឡែតនៅស្រុកកំណើតរបស់ខ្លួនដោយផ្ទាល់។ កាលពីមុននេះ មាមីងបងប្អូនធ្វើតែស្រូវចម្ការប៉ុននោះ ប្រាក់ចំណូលប្រែប្រួលមិនទៀងទាត់។ តាំងពីពេលងាកមកដាំដំណាំកាហ្វេវិញ ជីវភាពសេដ្ឋកិច្ចកែលម្អយ៉ាងច្រើន។
ភូមិ តឹនធឿង ៤ មានប្រជាជនចំនួន ៣៥០ ក្រុមគ្រួសារ ក្នុងនោះជាង ៥០% ជាបងប្អូនជនជាតិ ក្ហ។ ក្នុងអំឡុងឆ្នាំកន្លងទៅ ការក្លៀវក្លាហ៊ានងាកមកដាំដំណាំកាហ្វេ ទុរេន ចំបក់បារាំងបាននាំមកនូវប្រភពចំណូលដ៏ធំ។ តួយ៉ាងដូចជាក្រុមគ្រួសាររបស់លោក កគូ (អាយុ ៥០ ឆ្នាំ) មានផ្ទៃដីដាំដំណាំកាហ្វេជាង ៥ ហិកតា រំពឹងថារដូវប្រមូលផលនាពេលខាងមុខនឹង រកបានប្រាក់ចំណូលជាង ៣ ពាន់លានដុង ក្រុមគ្រួសារលោក ខ្មៅ (អាយុ ៣១ ឆ្នាំ) ក៏អាស្រ័យដោយចម្ការកាហ្វេ ៥.០០០ ម៉ែត្រការ៉េ បានជាសង់បានផ្ទះទំហំ ៦០ ម៉ែត្រការ៉េដ៏ធំទូលាយស្អាតបាត ជំនួសឲ្យផ្ទះឈើធ្លុះធ្លាយ ទ្រុឌទ្រោមពីមុននោះ។
តាមបណ្តោយផ្លូវជាតិលេខ ២៨ ឆ្លងកាត់ឃុំ ឌិញត្រាងធឿង ផ្ទះរឹងមាំជាច្រើនខ្នងបានលេចឡើងកណ្តាលកូនភ្នំកាហ្វេ។ លោក ក្បៀល លេខាសាខាបក្សភូមិ តឹនឡឹម ១ ឲ្យដឹងថា មូលដ្ឋានធ្លាប់បានប្រៀបប្រដូចជា "ភូមិនិគមវិឡា"។ អាស្រ័យដោយដាំដំណាំកាហ្វេឡើងវិញ អនុវត្តបច្ចេកទេសជឿនលឿន ជីវភាពប្រជាជនកាន់តែធូរធារពីមួយថ្ងៃទៅមួយថ្ងៃ ក្រុមគ្រួសារជាច្រើនទិញរថយន្ត ម៉ាស៊ីនភ្ជួររាស់ដើម្បីបម្រើផលិតកម្ម និងជីវភាពប្រចាំថ្ងៃ។
បច្ចុប្បន្ន ភូមិ តឹនឡឹម ១ មានជិត ២០០ ក្រុមគ្រួសារចំនួន ៨០% ជាជនជាតិ ក្ហ។ ទូទាំងភូមិលែងមានក្រុមគ្រួសារក្រីក្រទៀតហើយនៅតែ ៣ ក្រុមគ្រួសារជិតបន្ទាត់នៃភាពក្រីក្រប៉ុននោះ។ ចាប់តាំងពីដើមឆ្នាំ ២០២៥ មាន ១១ ក្រុមគ្រួសារសង់ផ្ទះថ្មី ហើយគ្រួសារជាច្រើនបានទិញរថយន្តតម្លៃទាំងពាន់លានទៀតផង។
យោងតាមលោក កដូ អនុប្រធានគណៈកម្មាធិការប្រជាជនឃុំ ឌិញត្រាងធឿង មានប្រសាសន៍ថា អំឡុងប៉ុន្មានខែចុងឆ្នាំ ២០២៥ ឃុំផ្តោតលើការជំរុញកសិកម្មផ្ទេរបច្ចេកទេសដាំដំណាំកាហ្វេជាង ១.០០០ ហិកតា ឡើងវិញបន្ថែមទៀត។ ឃុំកំណត់គោលដៅតម្លៃផលិតកម្មពីកាហ្វេ សម្រេចបានជាមធ្យមចំនួន ១៧៧ លានដុងក្នុងមួយហិកតា ប្រាក់ចំណូលមធ្យមក្នុង មនុស្សម្នាក់សម្រេចបានចំនួន ៦២ លានដុងក្នុងមួយឆ្នាំ។ ទន្ទឹមនឹងនោះ មូលដ្ឋានបន្តអនុវត្តកម្មវិធីកាត់បន្ថយភាពក្រីក្រ ធានាសុខុមាលភាពសង្គម រួមចំណែកលើកកម្ពស់គុណភាពនៃជីវភាពប្រជាជន៕
អត្ថបទ និងរូបថត៖ ង្វៀនយុង
ប្រែសម្រួល៖ អៀងថាន់
