ស្ថិរភាពប្រកបការងាររកស៊ីចិញ្ចឹមជីវិតផ្តើមពីកសិកម្មប្រពៃណី
លោក ឡឹមមួត (កើតឆ្នាំ ១៩៦០ ជាអ្នកមានកិត្យានុភាពម្នាក់នៅភូមិ កនត្រាន់) មានប្រសាសន៍ថា ការរស់នៅរបស់ប្រជាជននៅទីនេះមានស្ថិរភាពជាសារវន្តអាស្រ័យដោយផលិតកម្មកសិកម្ម។ ក្រុមគ្រួសារនីមួយៗមានដីធ្វើស្រែត្រឹមពី ១ ហិកតាឡើងទៅ ធានាស្បៀងអាហារគ្រប់គ្រាន់។ គ្រួសារលោកមានផ្ទៃដីចំនួន ១,៥ ហិកតា រដូវកាលនីមួយៗប្រមូលផលស្រូវចំនួន ៥ កុង (ប្រហែល ៥.០០០ ម៉ែត្រការ៉េ) សម្រាប់បរិភោគ ហើយចំណែកផ្ទៃដីនៅសល់ទុកសម្រាប់ដាំស្រូវដំណើបតាមកិច្ចសន្យាជាមួយនឹងសហគ្រាស ប្រាក់ចំណូលលំនឹងប្រហែល ៦.០០០ ដុងមួយគីឡូក្រាម។ ក្រៅពីការធ្វើស្រែដាំដុះស្រូវ ប្រជាជនក្នុងភូមិក៏បានដាំដំឡូងមី ទទួលការថែទាំព្រៃឈើដែលបានដាំ ឬធ្វើការស៊ីឈ្នួលតាមរដូវកាលផងដែរ។
ក្រៅពីការកសាងផ្នត់គំនិតរស់នៅថ្មី ភូមិ កនត្រាន់ នៅតែរក្សាបាននូវលក្ខណៈប្រពៃណីជាច្រើនរបស់ជនជាតិ ខ្មែរ។ អគារប្រជុំជីវភាពសហគមន៍របស់ភូមិទើបតែបានសាងសង់ថ្មីនៅឆ្នាំ ២០២៤ គឺជាកន្លែងរៀបចំសកម្មភាពសិល្បៈ មានដូចជា៖ រាំវង់ ឡាំថូនក្នុងឱកាសនៃពិធីបុណ្យចូលឆ្នាំថ្មី បុណ្យសែនដូនតាជាដើម។ នេះក៏ជាកន្លែងប្រជុំសកម្មភាពរួមរបស់បណ្តាជនជាតិដទៃទៀតដែលរស់នៅក្នុងភូមិផងដែរដូចជា៖ ចាម ស្ទៀង តៃ ថាយ មឿង។ល។
អ្នកមានកិត្យានុភាពក្នុងភូមិតែងតែដាស់តឿនបងប្អូនជនជាតិឲ្យផ្តោតលើពលកម្មផលិតកម្ម រក្សាដីសម្រាប់ដាំដុះ មិនទុកដីចោលទំនេរ ឬលក់ដីឡើយ។ ក្នុងអំឡុងពេលប៉ុន្មានឆ្នាំថ្មីៗនេះ កូនក្មួយបងប្អូនជនជាតិ ខ្មែរ កាន់តែផ្តោតលើការសិក្សាពីមួយថ្ងៃទៅមួយថ្ងៃ។ មានប្អូនជាច្រើនបានបន្តការសិក្សានៅអនុមហាវិទ្យាល័យ មហាវិទ្យាល័យ ហើយក្លាយជាវេជ្ជបណ្ឌិត ឱសថការី បុគ្គលិកធនាគារជាដើម។
គោលនយោបាយជនជាតិជាច្រើនបានដាក់ដំណើរការប្រកបដោយប្រសិទ្ធភាព
បន្ទាប់ពីការរួមបញ្ចូលគ្នា ឃុំ តឹនហ្វា មានក្រុមជនជាតិភាគតិចចំនួន ១៥ ក្រុម។ ឃុំបានអនុវត្តគោលនយោបាយឧបត្ថម្ភតំបន់បងប្អូនជនជាតិយ៉ាងសកម្ម ជាពិសេសក្នុងការផ្សព្វផ្សាយគោលការណ៍របស់បក្ស និងគោលនយោបាយច្បាប់របស់រដ្ឋស្តីពីកិច្ចការជនជាតិនិងសាសនា។ មូលដ្ឋានបានអនុវត្តកម្មវិធីគោលដៅជាតិសម្រាប់ការអភិវឌ្ឍសេដ្ឋកិច្ច សង្គមនៅតំបន់ជនជាតិភាគតិចនិងតំបន់ភ្នំដំណាក់កាលឆ្នាំ ២០២១ - ២០២៥។
ឃុំបានគួបផ្សំអនុវត្តគម្រោងអភិរក្សវប្បធម៌ទាំងឡាយ រួមទាំងការណែនាំពីក្រសួងវប្បធម៌ កីឡា និងទេសចរណ៍ស្តីពីការអភិរក្សតម្លៃវប្បធម៌ជនជាតិភ្ជាប់ជាមួយនឹងការអភិវឌ្ឍទេសចរណ៍។ កិច្ចការក្តាប់ស្ថានការណ៍ រក្សាទំនាក់ទំនងជាមួយអ្នកមានកិត្យានុភាពត្រូវបានយកចិត្តទុកដាក់ ឆ្លងតាមរយៈនោះដោះស្រាយទុក្ខកង្វល់ និងបំណងប្រាថ្នារបស់បងប្អូនជនជាតិទាន់ពេលវេលា។
រួមជាមួយនឹងការឧបត្ថម្ភសម្ភារៈ មូលដ្ឋានក៏បានសហការចលនាសប្បុរសជនជូនអំណោយជាង ៥០០ ចំណែកដែលមានតម្លៃ ១៩៥ លានដុងសម្រាប់ក្រុមគ្រួសារក្រីក្រ ក្រុមគ្រួសារជិតបន្ទាត់ភាពក្រីក្រ និងក្រុមគ្រួសារគោលនយោបាយ។ ជាពិសេស គណៈកម្មាធិការប្រជាជនស្រុក តឹនចូវ (អតីតខេត្ត តីនិញ) បានវិនិយោគលើការសាងសង់ផ្ទះប្រជុំជីវភាពសហគមន៍ក្នុងភូមិ កនត្រាន់ ដោយមានថវិកាសរុបជិត ១,៨៦ ពាន់លានដុង បានបញ្ចប់រួចរាល់ក្នុងឆ្នាំ ២០២៤ បង្កើតជាលម្ហប្រជុំជីវភាពវប្បធម៌ជូនបងប្អូនជនជាតិ ខ្មែរ។
យោងតាមអនុប្រធានគណៈកម្មាធិការប្រជាជនឃុំ តឹនហ្វា លោក វូ វ៉ាន់មិញ កិច្ចការជនជាតិនិងសាសនានៅមូលដ្ឋាននៅតែប្រឈមមុខជាមួយនឹងការលំបាកលំបិនមួយចំនួន។ កម្មាភិបាលទទួលបន្ទុកកិច្ចការជាច្រើន ខ្វះធនធានមនុស្ស និងជំនាញឯកទេស។ ការរស់នៅរបស់ប្រជាជនមួយចំនួននៅតែជួបការលំបាកលំបិន ហើយការខិតចូលជិតគោលនយោបាយនៅមានភាពយឺតយ៉ាវនៅឡើយ។ ការផ្សព្វផ្សាយច្បាប់ជួនកាលមិនហ្មត់ចត់ ឬសមស្របសម្រាប់ប្រជាជននៅតំបន់ដាច់ស្រយាល។ ថវិកាសម្រាប់សកម្មភាពវប្បធម៌ និងការរក្សាអត្តសញ្ញាណជនជាតិនៅមានកម្រិត។
យ៉ាងណាក៏ដោយ បងប្អូនជនជាតិ ខ្មែរ នៅ តឹនហ្វា តែងតែរក្សាស្មារតីសាមគ្គីជឿទុកចិត្តលើបក្សនិងរដ្ឋ ហើយធ្វើការរួមគ្នាដើម្បីកសាងការរស់នៅថ្មី។ នាពេលខាងមុខ ឃុំដាក់គោលដៅបន្តវិនិយោគលើការអភិវឌ្ឍសេដ្ឋកិច្ច - សង្គមតំបន់ជនជាតិ ជំរុញបង្វែររចនាសម្ព័ន្ធសេដ្ឋកិច្ច បង្កើនប្រាក់ចំណូល និងកាត់បន្ថយភាពក្រីក្រប្រកបដោយស្ថិរភាព។ មូលដ្ឋានបង្កើនការគ្រប់គ្រងសកម្មភាពសាសនា អញ្ជើញសួរសុខទុក្ខ ចលនាបងប្អូនជនជាតិពង្រឹងធ្លុងមហាសាមគ្គីប្រជាជាតិទាំងមូល និងប្រយុទ្ធប្រឆាំងជាមួយនឹងពាក្យសម្តីមួលបង្កាច់កេងប្រវ័ញ្ចពីបញ្ហាជនជាតិនិងសាសនា។
ការយកចិត្តទុកដាក់របស់អាជ្ញាធររួមជាមួយនឹងការប្រឹងប្រែងឈោងឈានឡើងដោយខ្លួនឯងរបស់បងប្អូនជនជាតិ ខ្មែរ កំពុងរួមចំណែកដល់ការកសាងមុខមាត់ថ្មីសម្រាប់តំបន់ព្រំដែន តីនិញ។ ផ្តើមពីភូមិស្រុកប្រពៃណី ការរស់នៅរបស់ប្រជាជនកាន់តែស្ថិរភាពពីមួយថ្ងៃទៅមួយថ្ងៃ វប្បធម៌ត្រូវបានថែរក្សា ស្មារតីសាមគ្គីភាពត្រូវបានពង្រឹង បង្កើតជាមូលដ្ឋានគ្រឹះសំខាន់សម្រាប់ការអភិវឌ្ឍក្នុងមូលដ្ឋានប្រកបដោយចីរភាព៕
អត្ថបទ និងរូបថត៖ ឌឹកហាញ់
ប្រែសម្រួល៖ ចន្ថា
