ពីតំបន់វាលទំនាបរហូតដល់តំបន់ភ្នំ ពីជនបទរហូតដល់ទីក្រុង ផ្ទះសម្បែងទាំងឡាយដែលត្រូវទឹកជំនន់កួចរសាត់ទៅ ឬបាក់រលំនោះ ឥឡូវនេះត្រូវបានសាងសង់ឡើងវិញយ៉ាងមាំទាំហើយ។ ផ្ទះថ្មីនីមួយៗ មិនត្រឹមតែជួយប្រជាជនឆាប់លំនឹងកន្លែងរស់នៅ ក្រោយពីគ្រោះធម្មជាតិប៉ុននោះទេ ថែមទាំងក្លាយជានិមិត្តរូបនៃមនោសញ្ចេតនាយ៉ាងជិតស្និទ្ធរវាងកងទ័ព និងប្រជាជនគឺប្រៀបដូចជាត្រី និងទឹក។
គ្រួសារលោក ត្រឹន ង៉ុកឌិញ (ជន្មាយុ ៦៣ ឆ្នាំ) នៅឃុំ ស៊ូយហៀប ខេត្ត ខាញ់ហ្វា គឺជាក្រុមគ្រួសារមួយក្នុងចំណោមក្រុមគ្រួសារមានផ្ទះត្រូវបាក់រលំទាំងស្រុង ដោយសារតែភ្លៀង និងទឹកជំនន់ កាលពីខែវិច្ឆិកា ឆ្នាំ២០២៥ កើតឡើង។ ឥឡូវនេះ គ្រួសាររបស់លោកបានគណៈកម្មាធិការប្រជាជនឃុំ ស៊ូយហៀប រៀបចំដីតាំងទីលំនៅឡើងវិញសម្រាប់សាងសង់ផ្ទះថ្មីហើយ។ លោកសប្បាយចិត្តខ្លាំងណាស់!
ដោយបានរដ្ឋឧបត្ថម្ភចំនួន ៦០ លានដុង សាច់ញាតិ និងមិត្តភក្តិចូលរួមវិភាគទានបន្តិចបន្តួច ក្រុមគ្រួសារលោកបានសាងសង់ផ្ទះថ្មីមួយខ្នងនៅលើផ្ទៃដីជិត ២០០ ម៉ែត្រការ៉េ ដោយចំណាយថវិកាជាង ៣០០ លានដុង។ កងទ័ពជើងទឹកភូមិភាគទី ៤ បានជួយជាកម្លាំងពលកម្មប្រចាំថ្ងៃសាងសង់ផ្ទះក្នុងរយៈពេលជិតមួយខែ។
យុទ្ធនាការ ក្វាងទ្រុង ដាក់ដំណើរការនៅខេត្ត ខាញ់ហ្វា ត្រូវបានបញ្ចប់ជាស្ថាពរ ប៉ុន្តែមនោសញ្ចេតនា និងរូបភាពរបស់កងកម្លាំងប្រដាប់អាវុធក្នុងឯកសណ្ឋានដែលធ្លាប់តែឃើញធ្វើការទាំងយប់ទាំងថ្ងៃ ដើម្បីសាងសង់ផ្ទះជូនជនរងគ្រោះដោយសារភ្លៀង និងទឹកជំនន់នោះនឹងដក់ជាប់ក្នុងដួងចិត្តរបស់ប្រជាជនជារៀងរហូត។
តាំងពីការចាប់ដៃ ឱបក្រសោប និងកែវភ្នែកយ៉ាងរំភើបនៅថ្ងៃលាគ្នាបានបង្ហាញយ៉ាងច្បាស់អំពីមនោសញចេតនា និងភក្តីភាពដ៏ជិតស្និទ្ធរវាងកងទ័ព និងប្រជាជន។ សម្រាប់ប្រជាជននៅតំបន់ទឹកជំនន់ លំនៅឋានថ្មីទាំងនេះមិនត្រឹមតែផ្តល់ជាជម្រកជៀសពីភ្លៀង ថ្ងៃក្តៅប៉ុននោះទេ ថែមទាំងជាទីពឹងផ្អែកខាងស្មារតីយ៉ាងរឹងមាំ ផ្តល់នូវក្តីសង្ឃឹមឈោងឈានឡើងក្នុងជីវិតក្រោយពីគ្រោះធម្មជាតិ។
ដោយស្មារតីទទួលខុសត្រូវ និងការប្តេជ្ញាចិត្តចេញពីបេះដូង កងកម្លាំងប្រដាប់អាវុធបានបញ្ជាក់តួនាទីរបស់ខ្លួនជាទីពឹងផ្អែកដ៏រឹងមាំរបស់ប្រជាជន លម្អបន្ថែមទៀតនូវប្រពៃណីសាមគ្គីភាព ផ្សារភ្ជាប់យ៉ាងស្អិតល្មួតរវាងកងទ័ព និងប្រជាជនក្នុងគ្រាមានអាសន្ន៕
អត្ថបទ និងរូបថត៖ ផានសៅ
ប្រែសម្រួល៖ ចន្ថា
