ទិវាបុណ្យមិនត្រឹមតែជាសកម្មភាពនៃវិធីសាស្រ្តសិក្សាប្រចាំឆ្នាំប៉ុននោះទេ ថែមទាំងបង្ហាញពីមហាវិទ្យាល័យបច្ចេកទេសមួយកំពុងតែធ្វើឱ្យក្លាយជាភាពជាក់ស្តែងនូវស្មារតីនៃសេចក្តីសម្រេចចិត្តលេខ 57-NQ/TW បន្តិចម្តងៗ តាមរយៈសកម្មភាពជាក់ស្តែងដូចជា៖ នាំយកការស្រាវជ្រាវវិទ្យាសាស្ត្រកាន់តែខិតជិតនឹងតថភាព ភ្ជាប់ជាមួយនឹងសហគ្រាស ជំរុញនវានុវត្តន៍ច្នៃប្រតិដ្ឋ និងបង្កើតប្រព័ន្ធអេកូឡូស៊ីផ្តើមអាជីពក្នុងសាលសហសិក្សាផ្ទាល់តែម្តង។
អនុសាស្ត្រាចារ្យ បណ្ឌិត ង្វៀន ហ៊ឺវហៀវ (នាយកមហាវិទ្យាល័យពុហុបច្ចេកទេស - មហាវិទ្យាល័យ ដាណាំង) មានប្រសាសន៍ថា ដើម្បីឲ្យការស្រាវជ្រាវនីមួយៗ មិនត្រឹមតែនៅលើក្រដាសប៉ុននោះទេ ថែមទាំងអាចភ្ជាប់នឹងជីវភាពរស់នៅ ប្រការសំខាន់គឺចាំបាច់បង្កើតបរិស្ថានតភ្ជាប់ គឺភ្ជាប់រវាងនិស្សិតជាមួយសាស្ត្រាចារ្យ រវាងសាលារៀនជាមួយនឹងសហគ្រាស និងគំនិតច្នៃប្រតិដ្ឋជាមួយនឹងប្រភពកម្លាំងវិនិយោគ។
ដូច្នោះហើយ ទិវាជួបជុំថ្ងៃនេះ គឺជាបរិយាកាសដើម្បីការតភ្ជាប់ប្រព្រឹត្តឡើងយ៉ាងធម្មតានិងមានប្រសិទ្ធភាពបំផុតតែម្តង។ ក្នុងចំណោមរាប់រយប្រធានបទបានដាក់បង្ហាញនៅក្នុងថ្ងៃនេះ នឹងមានពូជពន្លកនៃផលិតផលបច្ចេកវិទ្យា ធុរកិច្ចថ្មីៗ នាពេលអនាគតមានឈ្មោះថាពហុបច្ចេកទេស ដាណាំង ចេញទៅទីផ្សារក្នុងស្រុក និងអន្តរជាតិ។
ឆ្នាំ ២០២៦ ទិវាជួបជុំប្រព្រឹត្តឡើងដោយទ្រង់ទ្រាយធំបំផុតតាំងពីមុនមកដល់បច្ចុប្បន្ននេះ ប្រមូលផ្តុំប្រធានបទស្រាវជ្រាវវិទ្យាសាស្ត្រប្រចាំឆ្នាំចំនួន ៤៦៩ ប្រធានបទមានសក្តានុពលចំនួន ១៩ រួមជាមួយនឹងផលិតផលតាំងពិព័រណ៍ចំនួន ១២៨ មកពីដេប៉ាតឺម៉ង់ឯកទេសចំនួន ១៤។
ផ្តើមពីប្រធានបទស្រាវជ្រាវដែលបានធ្វើឡើងនៅក្នុងសាលសហសិក្សានាពេលបច្ចុប្បន្ន មានគំនិតបច្ចេកវិទ្យាថ្មីៗ ជាច្រើនអាចក្លាយជាផលិតផលសម្រាប់បម្រើជីវភាព រួមចំណែកបង្កើតធនធានមនុស្សមានគុណភាពខ្ពស់សម្រាប់បរិវត្តកម្មឌីជីថលនិងការអភិវឌ្ឍប្រទេសជាតិក្នុងដំណាក់កាលថ្មី៕
អត្ថបទ និងរូបថត៖ ខ្វាចឿង
ប្រែសម្រួល៖ អៀងថាន់
