កម្មវិធីត្រូវបានរៀបចំឡើងនៅថ្ងៃសៅរ៍ ថ្ងៃអាទិត្យ ដោយហ្វ្រេកង់ពីរដងក្នុងមួយខែ ឆ្ពោះទៅរកគោលដៅពីឆ្នាំ ២០២៦ ប្រជាជនម្នាក់ៗ បានពិនិត្យសុខភាពតាមកាលកំណត់ឬធ្វើតែសជម្រើសដោយឥតគិតថ្លៃយ៉ាងហោចណាស់ម្តងក្នុងមួយឆ្នាំ រួមចំណែកដល់ការផ្លាស់ប្តូរយ៉ាងខ្លាំងពីការព្យាបាលទៅបង្ការជំងឺជាមុន។
រថយន្តទាំងឡាយដឹក "គ្លីនិក" ឡើងទៅកាន់តំបន់ភ្នំ
នៅព្រឹកចុងសប្តាហ៍មួយ នៅស្ថានីយ៍សុខាភិបាលឃុំព្រំដែន ណាហ៊ី តាំងពីព្រលឹម ប្រជាជនជាច្រើនកុះករ ជាទូទៅជាជនជាតិភាគតិចបានមានវត្តមានរង់ចាំដល់វេនពិនិត្យសុខភាពដោយឥតគិតថ្លៃ។ នៅក្នុងទីធ្លាស្ថានីយ៍សុខាភិបាល គ្រូពេទ្យ វេជ្ជបណ្ឌិតរបស់មជ្ឈមណ្ឌលសុខាភិបាល ណឹមប៉ូ រួសរាន់ដំឡើងម៉ាស៊ីនថតអេកូយួរដៃ ម៉ាស៊ីនស្ទង់អគ្គិសនីបេះដូង រៀបចំឧបករណ៍យកសំណាកតេស្តដើម្បីចាប់ផ្តើមថ្ងៃធ្វើការពិសេសមួយ។
នៅពេលកិច្ចការត្រៀមរៀបចំរួចរាល់ ប្រជាជនបានវាស់សម្ពាធឈាម ពិនិត្យគ្លីនិក ថតអេកូ ស្ទង់អគ្គិសនីបេះដូង ពិគ្រោះយោបល់សុខភាពនិងណែនាំរបបអាហារូបត្ថម្ភ ប្រជុំជីវភាពរស់នៅសមស្រប។ សម្រាប់មនុស្សជាច្រើននៅតំបន់ព្រំដែន នេះជាលើកដំបូងទទួលបានសេវាវេជ្ជសាស្រ្តទាំងនេះនៅក្នុងមូលដ្ឋានយ៉ាងពេញលេញដោយមិនចាំបាច់ធ្វើដំណើរឆ្លងកាត់រយៈផ្លូវដ៏ឆ្ងាយទៅដល់មូលដ្ឋានសុខាភិបាល។
វេជ្ជបណ្ឌិត ឡេ ក្វាងដៀន នាយកមជ្ឈមណ្ឌលសុខាភិបាល ណឹមប៉ូ ឱ្យដឹងថា ទោះបីជាប្រជាជនភាគច្រើននៅ លើភូមិសាស្ត្របានមានប័ណ្ណធានារ៉ាប់រងសុខាភិបាលក៏ដោយប៉ុន្តែមិនទាន់បង្កើតទម្លាប់ពិនិត្យសុខភាពតាមកំណត់នៅឡើយទេ ជាធម្មតាទៅមូលដ្ឋានសុខាភិបាលនៅពេលឈឺតែប៉ុននោះ។ ព្រោះហេតុដូច្នេះ ការបញ្ជូនវេជ្ជបណ្ឌិតជាមួយគ្រឿងបរិក្ខារពេទ្យដល់ឃុំ ភូមិតែម្តងមិនត្រឹមតែជួយរកឃើញជំងឺមិនឆ្លងជាមុនដូចជាលើសឈាម ទឹកនោមផ្អែម សរសៃឈាមបេះដូង ជំងឺផ្លូវដង្ហើមរ៉ាំរ៉ៃដើម្បីគ្រប់គ្រង ព្យាបាលទាន់ពេលវេលាប៉ុននោះទេ ថែមទាំងរួមចំណែកដល់ការរៀបចំសំណុំឯកសារតាមដានសុខភាពជូនប្រជាជនតាមការកំណត់ទិសដៅរបស់ក្រសួងសុខាភិបាលទៀតផង។
យោងតាមលោក ដៀន រាល់លើកពិនិត្យសុខភាពចល័តសុទ្ធតែទទួលបានគាំទ្រជាវិជ្ជមានពីប្រជាជន។ មិនតិចករណីក្រោយពីពេលពិនិត្យរួចបានចលនាសាច់ញាតិ អ្នកជិតខាងមកពិនិត្យសុខភាពផងដែរ។ នេះក៏ជាសញ្ញាឱ្យឃើញផងដែរថាស្មារតីយល់ដឹងរបស់ប្រជាជនអំពីការថែទាំសុខភាពជាមុននិងការពិនិត្យសុខភាពតាមកាលកំណត់កំពុងផ្លាស់ប្តូរពីមួយជំហានទៅមួយជំហាន។
មិនត្រឹមតែនៅឃុំ ណាហ៊ី ប៉ុននោះទេ នៅឃុំ ថាញ់អាន ផងដែរ អំឡុងថ្ងៃសម្រាកចុងសប្តាហ៍ក៏បានក្លាយជាថ្ងៃធ្វើការរបស់កងជួរសុខាភិបាល។ យោងតាមវេជ្ជបណ្ឌិត ហ្វាង ធីម៉ាយថុង អនុប្រធានផ្នែកពិនិត្យជំងឺ មណ្ឌលសុខាភិបាល ថាញ់អាន អង្គភាពកសាងផែនការរៀបចំការពិនិត្យសុខភាពដោយឥតគិតថ្លៃចំនួនពីរដងក្នុងមួយខែនៅអំឡុងថ្ងៃចុងសប្តាហ៍។ មួយសប្តាហ៍រៀបចំពិនិត្យសុខភាពនៅមណ្ឌល ហើយមួយសប្តាហ៍ទៀត គ្រូពេទ្យ វេជ្ជបណ្ឌិតនិងអ្នកបច្ចេកទេសយកម៉ាស៊ីនថតអេកូ ម៉ាស៊ីនថតកាំរស្មីអ៊ិចចល័តរួមជាមួយឧបករណ៍យកសំណាកតេស្តចុះទៅកាន់ស្ថានីយសុខាភិបាលឃុំដើម្បីផ្តល់ការពិនិត្យសុខភាព ពិគ្រោះយោបល់សុខភាពដោយផ្ទាល់ជូនប្រជាជន។
បេសកកម្មវេជ្ជសាស្ត្រចល័តមិនត្រឹមតែជួយប្រជាជននៅតំបន់ជ្រៅ តំបន់ឆ្ងាយទទួលបានសេវាបច្ចេកទេសពេញលេញនៅក្នុងមូលដ្ឋានតែម្តងប៉ុននោះទេ ថែមទាំងបង្កើតល័ក្ខខ័ណ្ឌដើម្បីកងជួរខ្សែរយៈលើណែនាំដោយផ្ទាល់ ផ្ទេរបច្ចេកវិទ្យា លើកកម្ពស់សមត្ថភាពវិជ្ជាជីវៈជូនកម្មាភិបាលសុខាភិបាលថ្នាក់មូលដ្ឋាន។ អំឡុងថ្ងៃឈប់សម្រាកក៏ក្លាយជាថ្ងៃធ្វើការរបស់កងជួរគ្រូពេទ្យ វេជ្ជបណ្ឌិតនៅលើភូមិសាស្ត្រខេត្តទាំងមូល។
នៅខ្សែរយៈខេត្ត មន្ទីរពេទ្យពហុព្យាបាលខេត្ត ដៀនបៀន ក៏បានប្រមូលផ្តុំអ្នកជំនាញឯកទេសគ្រប់គ្រាន់ឱ្យចូលរួមក្នុងកម្មវិធីពិនិត្យសុខភាពដោយឥតគិតថ្លៃផងដែរ។ យោងតាមវេជ្ជបណ្ឌិត វូ វ៉ាន់ហាយ នាយករងមន្ទីរពេទ្យពហុព្យាបាលខេត្ត ដៀនបៀន ទោះបីជារៀបចំនៅថ្ងៃឈប់សម្រាកក៏ដោយ ក៏ប៉ុន្តែមន្ទីរពេទ្យនៅតែរៀបចំឱ្យកងជួរវេជ្ជបណ្ឌិត គិលានុបដ្ឋាករួមជាមួយនឹងប្រព័ន្ធធ្វើតែស ថតអេកូ ស្កែនរូបភាពរោគវិនិច្ឆ័យដំណើរការដូចថ្ងៃធ្វើការធម្មតាដើម្បីធានាគុណភាពពិនិត្យ ធ្វើតែសជម្រើសនិងពិគ្រោះយោបល់សុខភាពជូនប្រជាជន។
ក្រោយពីទទួលបានការជូនដំណឹងពីមូលដ្ឋាន លោកស្រី តុង ធីថាញ់ មកពីភូមិ ណងជឹន សង្កាត់ មឿងថាញ់ បានអញ្ជើញទៅមន្ទីរពេទ្យពហុព្យាបាលខេត្តពិនិត្យសុខភាព។ បានពិនិត្យសុខភាពទូទៅហើយបានវេជ្ជបណ្ឌិតផ្តល់ការពិគ្រោះយោបល់សុខភាពរបបប្រជុំជីវភាពរស់នៅសមស្រប លោកស្រីឱ្យដឹងថា មានអារម្មណ៍កាន់តែស្ងប់ចិត្តថែមទៀតអំពីស្ថានភាពសុខភាពរបស់ខ្លួន។ យោងតាមលោកស្រី កម្មវិធីពិនិត្យសុខភាពដោយឥតគិតថ្លៃគឺជាគោលនយោបាយយ៉ាងជាក់ស្តែង ជួយប្រជាជនទទួលបានការថែទាំសុខភាពតាំងពីមិនទាន់បានរកឃើញជំងឺម្លេះ។
បង្កើតទម្លាប់ម្ចាស់ការថែទាំសុខភាព
មិនត្រឹមតែបានពិនិត្យជំងឺ រកឃើញជំងឺតម្កាត់ជាមុនប៉ុននោះទេ ប្រជាជនជាច្រើននៅតំបន់ភ្នំ ខេត្ត ដៀនបៀន ក៏កំពុងផ្លាស់ប្តូរទម្លាប់ថែទាំសុខភាពបន្តិចម្តងៗ ម្ចាស់ការពិនិត្យសុខភាពតាមកាលកំណត់ជំនួសឱ្យការទៅមូលដ្ឋានសុខាភិបាលតែពេលឈឺថ្កាត់។
លោកស្រី ឡូ ធីឡាញ់ នៅភូមិ ណាទាន ឃុំ សាមមឺន ឱ្យដឹងថា កាលពីមុននេះទាល់តែពេលមានជំងឺទើបលោកស្រីទៅមូលដ្ឋានសុខាភិបាល។ ឥឡូវនេះ បានពិនិត្យសុខភាពដោយឥតគិតថ្លៃនៅក្នុងមូលដ្ឋានតែម្តង លោកស្រីដឹងច្បាស់ពីស្ថានភាពសុខភាពរបស់ខ្លននិងបានវេជ្ជបណ្ឌិតពិគ្រោះយោបល់របបព្យាបាល ថែទាំសមស្រប។ យោងតាមលោកស្រី ការបានពិនិត្យសុខភាពនៅក្នុងឃុំតែម្តងមិនត្រឹមជួយតែកាត់បន្ថយការចំណាយ ពេលវេលាធ្វើដំណើរទៅមកប៉ុននោះទេ ថែមទាំងបង្កើតការស្ងប់ចិត្តក្នុងការតាមដានសុខភាពទៀតផង។
រួមជាមួយបណ្តាឃុំព្រំដែន កម្មវិធីពិនិត្យសុខភាព ពិគ្រោះយោបល់ដោយឥតគិតថ្លៃក៏ត្រូវបានអនុវត្តក្នុងពេលដំណាលគ្នានៅតាមឃុំតំបន់ភ្នំស្ថិតក្នុងតំបន់ ដៀនបៀនដុង ពីមុនផងដែរ។ យោងតាមវេជ្ជបណ្ឌិត ដាម ថាញ់ទូ នាយកមជ្ឈមណ្ឌលសុខាភិបាល ដៀនបៀនដុង ជាអង្គភាពទទួលបន្ទុកការងារសុខាភិបាលនៅឃុំចំនួន ៦។ ទាំងនេះសុទ្ធតែជាភូមិសាស្ត្រតំបន់ភ្នំ ល័ក្ខខ័ណ្ឌសេដ្ឋកិច្ច - សង្គមនៅលំបាក ហើយការទទួលបានសេវាសុខភាពរបស់ប្រជាជនពីមុននេះនៅមានកម្រិត។
ក្រោយពីពេលកម្មវិធីត្រូវបានដាក់ឱ្យដំណើរការភ្លាម មជ្ឈមណ្ឌលបានកសាងផែនការចាត់បុគ្គលិករៀបចំការពិនិត្យសុខភាពដោយឥតគិតថ្លៃនៅ ១០០% ចំនួនឃុំបានប្រគល់ឱ្យទទួលខុសត្រូវ។ រហូតមកដល់បច្ចុប្បន្ននេះ មានមនុស្សចំនួន ៤.៧៧៤ លើកនាក់បានពិនិត្យសុខភាពតាមកាលកំណត់និងពិនិត្យសុខភាពជម្រើសដោយឥតគិតថ្លៃ។ យោងតាមលោក ទូ ការរក្សាវគ្គពិនិត្យសុខភាពនៅថ្ងៃសៅរ៍ ថ្ងៃអាទិត្យមិនត្រឹមតែជួយប្រជាជនទទួលបានសេវាសុខាភិបាលកាន់តែងាយស្រួលថែមទៀតប៉ុននោះទេ ថែមទាំងរួមចំណែកដល់ការលើកកម្ពស់ស្មារីតយល់ដឹងអំពីការពិនិត្យសុខភាពតាមកាលកំណត់ ឆាប់បានរកឃើញជំងឺរ៉ាំរ៉ៃជាមុនដើម្បីតាមដាននិងព្យាបាលទាន់ពេលវេលា។
ក្រោយពីពេលអនុវត្តជាងពីរខែ កម្មវិធីបានរៀបចំឡើងនៅក្នុងឃុំ សង្កាត់ចំនួន ៤៥ ក្នុងចំណោមឃុំសង្កាត់ទាំង ៤៥ នៅលើភូមិសាស្ត្រខេត្ត។ រហូតដល់ថ្ងៃទី ២៨ ខែ មិថុនា ឆ្នាំ ២០២៦ ប្រជាជនទូទាំងខេត្តមានជាង ៦៩.០៨០ លើកនាក់បានពិនិត្យសុខភាព ពិគ្រោះយោបល់សុខភាពដោយឥតគិតថ្លៃ សម្រេចបានចំនួន ១០,១៩% នៃចំនួនប្រជាជនទូទាំងខេត្ត។ ក្នុងនោះមានមនុស្សចាស់ចំនួន ១១.២៨៥ នាក់និងមនុស្សដែលមានជំងឺរ៉ាំរ៉ៃចំនួន ៥.០៣៥ នាក់ ដែលត្រូវបានគ្រប់គ្រង តាមដាន។ ឆ្លងតាមរយៈពិនិត្យសុខភាពជម្រើស មូលដ្ឋានសុខភាពរកឃើញករណីកើតជំងឺលើសឈាម ជំងឺទឹកនោមផ្អែមចំនួន ៧៨៥ ករណីថ្មី ករណីកើតជំងឺផ្សេងទៀតចំនួន ១៩.៥៤៣ ករណីនិងធ្វើបញ្ជាប៉ារ៉ាគ្លីនីកចំនួន ២៣.៥៦៤ លើកនាក់ដូចជាថតអេកូ កាំរស្មីអ៊ិច ស្ទង់អគ្គិសនីបេះដូងជាដើម។
ដើម្បីនាំយកសេវាថែទាំសុខភាពឱ្យកាន់តែខិតជិតដល់ប្រជាជន ផ្នែកសុខាភិបាលបានចល័តបុគ្គលិកចំនួន ៣.២៦០ នាក់ចូលរួមក្នុងការពិនិត្យសុខភាពចល័តនៅស្ថានីយសុខាភិបាល ស្ថានីយសុខាភិបាលគោលដៅនិងសហគមន៍ ក្នុងនោះមានកម្មាភិបាលខ្សែរយៈខេត្តចំនួន ២៣៥ កម្មាភិបាលមជ្ឈមណ្ឌលសុខាភិបាលចំនួន ១.១៧៣ លើកនាក់កម្មាភិបាលស្ថានីយសុខាភិបាលចំនួន ១.៥០៧ លើកនាក់ រួមជាមួយនឹងការចូលរួមពីកងកម្លាំងពេទ្យយោធា ពេទ្យយោធាតាមប៉ុស្តិ៍ការពារព្រំដែននិងអាជ្ញាធរមូលដ្ឋាន។ កម្មាភិបាលថែទាំសុខភាពរាប់ពាន់លើកនាក់បានធ្វើការពេញអំឡុងថ្ងៃសម្រាកចុងសប្តាហ៍ដើម្បីធានាថាប្រជាជននៅតំបន់ជ្រៅ តំបន់ឆ្ងាយបានទទួលសេវាថែទាំសុខភាពនៅក្នុងមូលដ្ឋានតែម្តង។
យោងតាមលោក ផាម វ៉ាន់ម៉ឹន អនុប្រធានមន្ទីរសុខាភិបាលខេត្ត ដៀនបៀន ក្រោយពីទទួលបានការណែនាំពីក្រសួងសុខាភិបាលនិងថ្នាក់ដឹកនាំខេត្ត មន្ទីរសុខាភិបាលបានកសាងផែនការអនុវត្តកម្មវិធីពិនិត្យ ពិគ្រោះយោបល់សុខភាពដោយឥតគិតថ្លៃនៅទូទាំងខេត្តភ្លាម។ អង្គភាពនានាម្ចាស់ការរៀបចំបុគ្គលិកនិងគ្រឿងបរិក្ខារពេទ្យ រៀបចំការពិនិត្យសុខភាពនៅថ្ងៃសៅរ៍ ថ្ងៃអាទិត្យដោយហ្វ្រេកង់ពីរដងក្នុងមួយខែ ខិតខំពីឆ្នាំ ២០២៦ ប្រជាជនគ្រប់រូបទទួលបានការពិនិត្យសុខភាពតាមកាលកំណត់ឬពិនិត្យសុខភាពជម្រើសដោយឥតគិតថ្លៃយ៉ាងហោចណាស់ម្តងក្នុងមួយឆ្នាំ។
ចាប់ពីបណ្តាចំណុចពិនិត្យព្យាបាលចល័តនៅតាមឃុំតំបន់ភ្នំ តំបន់ព្រំដែនរហូតដល់គ្លីនិកដែលដំណើរការពេញមួយថ្ងៃឈប់សម្រាកនៅមន្ទីរពេទ្យពហុព្យាបាលខេត្ត កម្មវិធីពិនិត្យ ពិគ្រោះយោបល់សុខភាពដោយឥតគិតថ្លៃ កំពុងនាំយកសេវាថែទាំសុខភាពមកកាន់តែជិតប្រជាជនពីមួយជំហានទៅមួយជំហានថែមទៀត។ នៅពីក្រោយជើកពិនិត្យជំងឺទាំងនោះ គឺជាការលះបង់របស់កងជួរគ្រូពេទ្យអស់ពីចិត្តពីថ្លើម ផ្អាកជាបណ្ដោះអាសន្នថ្ងៃឈប់សម្រាកដើម្បីនាំយកសេវាថែទាំសុខភាពដល់មូលដ្ឋានតែម្តង។ មិនត្រឹមតែជួយរកឃើញជំងឺជាមុនទាន់ពេលវេលាប៉ុននោះទេ ថែមទាំងរួមចំណែកដល់ការបង្កើតទម្លាប់នៃការពិនិត្យសុខភាពតាមកាលកំណត់ ឆ្ពោះទៅរកគោលដៅគ្រប់គ្រងសុខភាពប្រជាជនទាំងមូលនិងផ្លាស់ប្តូរយ៉ាងខ្លាំងពីការព្យាបាលទៅបង្ការជំងឺជាមុន៕
អត្ថបទ៖ ស៊ន់ទឺ - ទីភ្នាក់ងារព័ត៌មានវៀតណាម
ប្រែសម្រួល៖ ពេជ្រពិសិដ្ឋ
