លោកឧត្តមសេនីយ៍ឯក ផាន វ៉ាន់យ៉ាង និងក្រុមការងារនៃគណៈកម្មាធិការយោធាមជ្ឈិមបក្ស ក្រសួងការពារជាតិបានអញ្ជើញដាក់កម្រងផ្កា អុជធូបនៅស្តូបអតីតអគ្គលេខាបក្ស ត្រឹនភូ អគារគោលថ្មចារឹកគោរពរំលឹកវិញ្ញាណក្ខន្ធវីរយុទ្ធជនពលីក្នុងការវាយសម្រុកជាទូទៅ និងការក្រោកឈរឡើងនិទាឃរដូវឆ្នាំវក សំរឹទ្ធិស័ក ១៩៦៨ អគារគោរពរំលឹកវិញ្ញាណក្ខន្ធតម្កល់អដ្ឋិធាតុយុទ្ធជនពលីទើបរកឃើញថ្មីនៅឧទ្យាន លេ ធីរៀង គោលថ្មចារឹកគោរពរំលឹកវិញ្ញាណក្ខន្ធវីរយុទ្ធនារីពលី លេ ធីរៀង។
លោកឧត្តមសេនីយ៍ឯក ផាន វ៉ាន់យ៉ាង ក៏បានអញ្ជើញចុះពិនិត្យផ្ទាល់ការងារស្វែងរក ប្រមូលផ្តុំអដ្ឋិធាតុយុទ្ធជនពលីនៅផ្ទាល់ភូមិសាស្រ្តនៅកន្លែងកំណាយរុករក ជីកគាស់ ប្រមូលផ្តុំ និងពិនិត្យបញ្ជាក់ព័ត៌មាន យកសំណាកកំណត់ព័ត៌មានយុទ្ធជនពលី អញ្ជើញសួរសុខទុក្ខ លើកទឹកចិត្តនិងជូនអំណោយកម្មាភិបាល យុទ្ធជនកងកម្លាំងចូលរួមការងារស្វែងរកអដ្ឋិធាតុយុទ្ធជនពលីលះបង់ក្នុងការវាយសម្រុកទូទៅ និងការក្រោកឈរឡើងនិទាឃរដូវឆ្នាំ វក សំរឹទ្ធិស័ក ១៩៦៨ នៅឧទ្យាន លេ ធីរៀង។
សកម្មភាពរបស់ក្រុមការងារបង្ហាញពីការដឹងគុណយ៉ាងជ្រាលជ្រៅរបស់បក្ស រដ្ឋ និងកងទ័ពចំពោះវីរយុទ្ធជនពលីដែលបានពលីជីវិតយ៉ាងអង់អាចដើម្បីឯករាជ្យ សេរីភាពរបស់មាតុភូមិ។ ព្រមទាំងបញ្ជាក់ពីការយកចិត្តទុកដាក់យ៉ាងខ្លាំងចំពោះការងារស្វែងរក ប្រមូលផ្តុំអដ្ឋិធាតុយុទ្ធជនពលី រួមចំណែកក្នុងការអនុវត្តគោលនយោបាយ "តបស្នងសងគុណ" ថែទាំអ្នកមានគុណបំណាច់នឹងបដិវត្តន៍យ៉ាងល្អប្រសើរ និងអប់រំប្រពៃណីស្នេហាជាតិ ក្រមសីលធម៌ "ផឹកទឹកនឹកប្រភព" សម្រាប់យុវជនគ្រប់ជំនាន់នាពេលបច្ចុប្បន្ន និងអនាគត។
សកម្មភាពស្វែងរក ប្រមូលផ្តុំអដ្ឋិធាតុយុទ្ធជនពលីនៅឧទ្យាន លេ ធីរៀង ស្ថិតក្នុង "យុទ្ធនាការ ៥០០ ថ្ងៃ និងយប់" ស្វែងរក ប្រមូលផ្តុំ និងកំណត់អត្តសញ្ញាណអដ្ឋិធាតុយុទ្ធជនពលីនៅមិនខ្វះព័ត៌មាន ឆ្ពោះទៅរំឭកខួបអនុស្សាវរីយ៍លើកទី ៨០ ឆ្នាំនៃទិវាយុទ្ធជនពិការ - យុទ្ធជនពលី។
យុទ្ធនាការនេះប្រព្រឹត្តឡើងចាប់ពីថ្ងៃទី ១៥ ខែ មីនា ឆ្នាំ២០២៦ រហូតដល់ថ្ងៃទី ២៧ ខែកក្កដា ឆ្នាំ ២០២៧ បំផុសឡើងជាផ្លូវការពីថ្ងៃទី ២ ខែមេសា ឆ្នាំ២០២៦។ គិតដល់ដាច់ថ្ងៃទី ២៤ ខែ កក្កដា ឆ្នាំ២០២៦ នៅកន្លែងកំណាយរុករក ២ កន្លែងក្នុងឧទ្យាន លេ ធីរៀង ក្រុមការងារស្វែងរក ប្រមូលផ្តុំអដ្ឋិធាតុយុទ្ធជនពលីនៃបញ្ជាការដ្ឋានទីក្រុង ហូ ជីមិញ បានស្វែងរក ជីកគាស់ ប្រមូលផ្តុំបានចំនួន ១០១ គ្រោងអដ្ឋិធាតុយុទ្ធជនពលី និងគ្រោងអដ្ឋិធាតុយុទ្ធជនពលីរួមចំនួន ៥ រួមជាមួយនឹងមតកវត្ថុមួយចំនួនរបស់យុទ្ធជនពលីភ្ជាប់តាម៕
អត្ថបទនិងរូបថត៖ ស្វឹនឃូ
ប្រែសម្រួល៖ ចន្ថា
