ក្នុងចំណោមប្អូនៗ សិស្សសាលាត្រូវបានលើកសរសើរមានគំរូជាច្រើនពោរពេញដោយឆន្ទៈ។ តួយ៉ាងដូចជាប្អូន ហ្វាង ង្វៀនថាញ់ ជនជាតិ តៃ សិស្សសាលាថ្នាក់ទី ១១ វិទ្យាល័យឯកទេស បាក់កាន (សង្កាត់ បាក់កាន) កត់ត្រាស្លាកស្នាមជាមួយនឹងសមិទ្ធផលដណ្តើមបានពានរង្វាន់ជាសិស្សរៀនសូត្រពូកែថ្នាក់ជាតិវិញ្ញាសាភាសា អង់គ្លេស និងមេដាយមាស អូឡាំពិក បោះជំរុំរដូវវិស្សមកាល ហ៊ុងវឿង។
ប្អូន វី ធីលាញ់ ជនជាតិ នុង សិស្សសាលាថ្នាក់ទី ៩ អនុវិទ្យាល័យ តឹនថាញ់ (ឃុំ តឹនថាញ់) គឺជាគំរូជម្នះការលំបាករៀនសូត្រពូកែ។ ទោះបីជាស្ថានភាពគ្រួសារនៅជួបលំបាកក៏ដោយ ក្រៅម៉ោងរៀន នាងនៅបានជួយឪពុកម្តាយធ្វើស្រែចម្ការ រំឭកមេរៀនសារឡើងវិញដោយខ្លួនឯង និងពូកែយកឈ្នះពានរង្វាន់លើកទឹកចិត្តសិស្សពូកែថ្នាក់ខេត្តវិញ្ញាសាអក្សរសាស្រ្ត ព្រមទាំងក្លាយជាសិស្សដែលទទួលបានពិន្ទុខ្ពស់បំផុតក្នុងការប្រឡងចូលវិទ្យាល័យ ភូប៊ិញ ឆ្នាំ ២០២៦ ទៀតផង។
ខណៈពេលនោះ ប្អូន លឿង គ្វិញញឺ ជនជាតិ តៃ សិស្សសាលាថ្នាក់ទី ៣ សាលាបឋមសិក្សា ក្វាងជូ (ឃុំ ចើមើយ) គឺជាវង់ភ័ក្រ្តតួយ៉ាងក្នុងការថែរក្សាលើកស្ទួយអត្តសញ្ញាណវប្បធម៌ជនជាតិ តៃ។ ដោយបានចិញ្ចឹមធំធាត់ក្នុងបរិយាកាសវប្បធម៌ប្រពៃណីជាមួយនឹងចង្វាក់តន្រ្តី ថែន និងសំឡេងចាប៉ី ទិញ តាំងពីក្មេង ប្អូនឆាប់បង្ហាញពីចំណង់ចំណូលចិត្ត និងរួមចំណែកក្នុងការផ្សព្វផ្សាយតម្លៃវប្បធម៌ជនជាតិ។ល។ ក្នុងចំណោមសិស្សសាលាចំនួន ២៣០ រូបត្រូវបានលើកសរសើរ សិស្សជនជាតិ តៃ មានចំនួនច្រើនជាងគេដោយមានចំនួន ១១៥ រូប បន្ទាប់គឺជនជាតិ នុង (៤៥ រូប) សាន់យីវ (២២ រូប) យ៉ាវ (២០ រូប) នៅសល់ពីនោះគឺជាសិស្សសាលាចំណុះជនជាតិ ម៉ុង សាន់ចាយ មឿង កៅឡាន ង៉ាយ សាន់ជី ឡាហា ចិន និង អេដេ។
ប៉ុន្មានឆ្នាំកន្លង ខេត្ត ថាយង្វៀន តែងតែកំណត់ការអប់រំនិងបណ្តុះបណ្តាលជាគោលនយោបាយជាតិដំបូងគេ ជាកម្លាំងចលករដ៏សំខាន់សម្រាប់ការអភិវឌ្ឍធនធានមនុស្ស ជាពិសេសគឺនៅតំបន់បងប្អូនជនជាតិភាគតិចនិងតំបន់ភ្នំ។ ក្នុងឆ្នាំសិក្សា ២០២៥ - ២០២៦ ការងារអប់រំនៅក្នុងតំបន់នេះបន្តសម្រេចបានលទ្ធផលវិជ្ជមានជាច្រើន។
បណ្តាញសាលារៀន ថ្នាក់រៀនត្រូវបានពង្រឹង គោលនយោបាយសម្រាប់សិស្សត្រូវបានអនុវត្តយ៉ាងពេញលេញ ហើយប្រព័ន្ធសាលាអន្តេវាសិកជនជាតិ បង្រៀននិងរៀនពេញមួយថ្ងៃបានពង្រីកឱ្យទូលាយប្រកបដោយប្រសិទ្ធភាព។ ជាពិសេស ក្នុងចំណោម ១២៥ ពានរង្វាន់សិស្សរៀនសូត្រពូកែថ្នាក់ជាតិរបស់ខេត្ត មានចំនួន ២៩ សិស្សសាលាជាបងប្អូនជនជាតិភាគតិចទទួលបានពានរង្វាន់ បញ្ជាក់ពីស្មារតីស្រលាញ់ការសិក្សា ឆន្ទៈជម្នះការលំបាកនិងបំណងប្រាថ្នាឈោងឈានឡើងរបស់សិស្សនៅតំបន់បងប្អូនជនជាតិភាគតិច។
លោក ណុង ក្វាងញឹត អនុប្រធានគណៈកម្មាធិការប្រជាជនខេត្ត ថាយង្វៀន អះអាងថា ការអប់រំនៅតំបន់បងប្អូនជនជាតិភាគតិចនិងតំបន់ភ្នំមិនត្រឹមតែបើកឱកាសសម្រាប់ការអភិវឌ្ឍសម្រាប់បុគ្គលម្នាក់ៗ ប៉ុននោះទេ ថែមទាំងរួមចំណែកលើកកម្ពស់ប្រជាបញ្ញា កាត់បន្ថយភាពក្រីក្រប្រកបដោយចីរភាព រក្សាអត្តសញ្ញាណវប្បធម៌ និងបង្កើតមូលដ្ឋានគ្រឹះសម្រាប់ការអភិវឌ្ឍក្នុងរយៈពេលវែងរបស់ខេត្តទៀតផង។ លោកបញ្ជាក់ថា សិស្សបានលើកសរសើរនៅក្នុងថ្ងៃនេះគឺជា «បុប្ឆាដ៏ស្រស់បំព្រង» របស់ផ្នែកអប់រំ តំណាងឱ្យប្រពៃណីស្រលាញ់ការសិក្សា ស្មារតីជម្នះការលំបាក និងបំណងប្រាថ្នាក្នុងការដណ្តើមយកជម្នះពុទ្ធិរបស់បងប្អូនបណ្តាជនជាតិនៃខេត្ត ថាយង្វៀន។
នាពេលខាងមុខ ខេត្ត ថាយង្វៀន ស្នើសុំមន្ទីរអប់រំនិងបណ្តុះបណ្តាលបន្តលើកកម្ពស់គុណភាពអប់រំគ្រប់ជ្រុងជ្រោយ យកចិត្តទុកដាក់លើការកឃើញ បំប៉នសិស្សសាលាដែលមានទេពកោសល្យ រៀនសូត្រពូកែដែលជាបងប្អូនជនជាតិភាគតិច ជំរុញបរិវត្តកម្មឌីជីថលក្នុងវិស័យអប់រំ ផ្នែកជនជាតិនិងសាសនាសហការអនុវត្តគោលនយោបាយជនជាតិប្រកបដោយប្រសិទ្ធភាព បង្កបង្កើតប្រភពកម្លាំងពលកម្មវ័យក្មេងមានគុណភាពខ្ពស់។ ទន្ទឹមនោះ គ្រប់លំដាប់ថ្នាក់ ផ្នែក មូលដ្ឋាននិងសង្គមទាំងមូលបន្តធ្វើការរួមដៃគ្នាថែទាំសិស្សសាលានៅតំបន់ជ្រៅ តំបន់ឆ្ងាយ តំបន់លំបាកខ្លាំង ធានាថាគ្រប់កុមារទាំងអស់មានឱកាសរៀនសូត្រ និងធំលូតលាស់គ្រប់ជ្រុងជ្រោយ មិនឱ្យសិស្សណាម្នាក់ត្រូវទុកចោលនៅខាងក្រោយដោយសារតែស្ថានភាពលំបាកលំបិនឡើយ៕
អត្ថបទនិងរូបថត៖ ធូហាំង
ប្រែសម្រួល៖ សិរីសួស្តី
