នៅឃុំ ឡុងដៀន ផ្ទះចំនួន ១០ ខ្នងទើបតែចាប់ផ្តើមការសាងសង់សម្រាប់ជូនក្រុមគ្រួសារក្រីក្រ ជិតបន្ទាត់ភាពក្រីក្រដែលជាបងប្អូនជនជាតិ ខ្មែរ។ ផ្ទះទាំងនេះនៅក្នុងផែនការលេខ 314/KH-UBND ចុះថ្ងៃទី ១ ខែ មិថុនា ឆ្នាំ ២០២៦ របស់គណៈកម្មាធិការប្រជាជនខេត្ត និងផែនការលេខ 76/KH-MTTQ ចុះថ្ងៃទី ២ ខែ មិថុនា ឆ្នាំ ២០២៦ របស់គណៈ អចិន្ត្រៃយ៍នៃគណៈកម្មាធិការរណសិរ្សមាតុភូមិវៀតណាមខេត្ត កាម៉ៅ ស្តីអំពីដំណើរការសាងសង់ផ្ទះចំនួន ១.០០០ ខ្នងជូនមុខសញ្ញាដែលមានជីវភាពលំបាកលំបិន។
ប្រធានគណៈកម្មាធិការប្រជាជនឃុំ ឡុងដៀន ង្វៀន ហុងកឹម ចែករំលែកថា៖ ការសាងសង់ផ្ទះថ្មីជូនអ្នកក្រីក្រមិនត្រឹមតែជួយពួកគាត់មានស្ថានភាពរស់នៅល្អប្រសើរឡើងប៉ុននោះទេ ថែមទាំងបង្កើតមូលដ្ឋានគ្រឹះសម្រាប់ការអភិវឌ្ឍប្រកបដោយស្ថិរភាពទៀតផង។ ផ្ទះទើបសាងសង់ថ្មីនីមួយៗ បានឧបត្ថម្ភចំនួន ៨០ លានដុង ធានាស្តង់ដារ "៣ រឹងមាំ" រួមមានគ្រឹះរឹងមាំ ស៊ុម - ជញ្ជាំងរឹងមាំ និងដំបូលរឹងមាំ ធានាគុណភាព ភាពធន់ និងសុវត្ថិភាពក្នុងអំឡុងពេលប្រើប្រាស់។
ឃុំក៏បានផ្តល់អាទិភាពសាងសង់បន្ទប់អនាម័យដើម្បីរួមចំណែកដល់ការកែលម្អលក្ខខណ្ឌប្រជុំជីវភាព ការពារសុខភាពរបស់ប្រជាជនផងដែរ។ គិតត្រឹមចុងខែ មិថុនា ឆ្នាំ ២០២៦ ឃុំ ឡុងដៀន បានចាប់ផ្តើមសាងសង់ផ្ទះចំនួន ១៤ ខ្នងសម្រាប់ជូនមុខសញ្ញាដែលលំបាកអំពីផ្ទះលំនៅ ក្នុងនោះមានផ្ទះ ១ ខ្នងបានសាងសង់រួចរាល់ជាស្ថាពរ បានពិនិត្យទទួល និងដាក់ឱ្យប្រើប្រាស់។
គ្រួសារលោក ទ្រិញ ថាញ់យុង នៅភូមិ ថាញ់ទ្រី គឺជាក្រុមគ្រួសារមួយត្រូវបានជ្រើសរើសសាងសង់ផ្ទះជូនសម្រាប់ក្រុមគ្រួសារក្រីក្រ ជិតបន្ទាត់ក្រីក្រដែលជាបងប្អូនជនជាតិ ខ្មែរ ដំណាក់កាលទី ១ របស់ឃុំ ឡុងដៀន។ លោកបានឲ្យដឹងថា៖ គ្រួសារនៅជួបលំបាកជាច្រើន ជាចម្បងគឺធ្វើការងារស៊ីឈ្នួល ប្រាក់ចំណូលមិនទៀងទាត់ដូច្នេះហើយទើបមិនមានលទ្ធភាពសាងសង់ផ្ទះថ្មី។ គ្រួសារខ្ញុំនឹងចូលរួមចំណែកដើម្បីធ្វើឱ្យផ្ទះកាន់តែធំទូលាយ មាំទាំបន្ថែមទៀត។
នៅឃុំ ហ៊ឹងហូយ ដំណើរការសាងសង់ផ្ទះជូនក្រុមគ្រួសារក្រីក្រ និងគ្រួសារគោលនយោបាយកំពុងត្រូវបានអនុវត្តជាបន្ទាន់។ លោក ង្វៀន ហ្វាងអែម អនុប្រធានគណៈកម្មាធិការប្រជាជនឃុំ ហ៊ឹងហូយ មានប្រសាសន៍ថា៖ យោងតាមស្ថិតិ មូលដ្ឋានមានករណីចំនួន ១៣ ទទួលឧបត្ថម្ភ។ អង្គភាពសមត្ថកិច្ចធ្វើការជាបន្ទាន់ជាមួយក្រុមគ្រួសារដើម្បីចាប់ផ្តើមសាងសង់ក្នុងរយៈពេលឆាប់ៗ នេះ។ រួមជាមួយនឹងការពន្លឿន ឃុំ ហ៊ឹងហូយ យកចិត្តទុកដាក់ជាពិសេសចំពោះគុណភាពនៃការសាងសង់ ជួយប្រជាជនឱ្យមានផ្ទះរឹងមាំទាំ។ ឃុំនឹងចលនាថ្ងៃពលកម្មបន្ថែម ជួយគ្រួសារទាំងឡាយកាត់បន្ថយការចំណាយលើការសាងសង់។
យោងតាមលោក ង្វៀន វ៉ាន់ឃើយ អនុប្រធានគណៈកម្មាធិការរណសិរ្សមាតុភូមិខេត្ត កាម៉ៅ មានប្រសាសន៍ ក្នុងរយៈពេលប៉ុន្មានឆ្នាំកន្លង កិច្ចការលុបបំបាត់ភាពអត់ឃ្លាន កាត់បន្ថយភាពក្រីក្រនៅក្នុងខេត្តសម្រេចបានលទ្ធផលវិជ្ជមានជាច្រើន ជួយរាប់សិបពាន់ក្រុមគ្រួសារមានលក្ខខណ្ឌឈោងឈានឡើងរួចផុតពីភាពក្រីក្រ ស្ថិរភាពជីវភាពរស់នៅពីមួយជំហានទៅមួយជំហាន។ ប៉ុន្តែនៅក្នុងខេត្តនៅមានជាង ៣.០០០ ក្រុមគ្រួសារក្រីក្រ និងគ្រួសារជិតបន្ទាត់ភាពក្រីក្រជាង ៧.០០០ ក្រុមគ្រួសារត្រូវការឧបត្ថម្ភលំនៅ និងលក្ខខណ្ឌប្រជុំជីវភាព។
យោងតាមលោក ង៉ូ វូថាំង អនុប្រធានគណៈកម្មាធិការប្រជាជនខេត្ត កាម៉ៅ ឱ្យដឹងថា៖ គណៈកម្មាធិការប្រជាជនខេត្តបានចេញផែនការលេខ 314/KH-UBND ស្តីអំពីដំណើរការអនុវត្តជួយឧបត្ថម្ភការសាងសង់ ជួសជុលផ្ទះជូនមុខសញ្ញាដែលជួបការលំបាកអំពីលំនៅឆ្នាំ ២០២៦ ធ្វើឱ្យទៅជាភាពជាក់ស្តែងគោលការណ៍ គោលនយោបាយរបស់បក្សនិងរដ្ឋស្តីអំពីការធានាសុខុមាលភាពសង្គម ឧបត្ថម្ភលំនៅជូនក្រុមគ្រួសារក្រីក្រ ជិតបន្ទាត់ភាពក្រីក្រ និងកូនបង្កើតរបស់អ្នកតស៊ូប្រយុទ្ធត្រូវរងផលប៉ះពាល់ដោយសារតែជាតិគីមីពុលកំពុងប្រឈមនឹងការលំបាកអំពីផ្ទះលំនៅ។
ខេត្តនឹងឧបត្ថម្ភសាងសង់ផ្ទះថ្មីនិងជួសជុលផ្ទះចំនួន ១.០៦៩ ខ្នងនៅក្នុងខេត្ត ធានា "៣ រឹងមាំ" (គ្រឹះរឹងមាំ ស៊ុម - ជញ្ជាំងរឹងមាំ ដំបូលរឹងមាំ)។ មុខសញ្ញាទទួលឧបត្ថម្ភរួមមានក្រុមគ្រួសារក្រីក្រ ជិតបន្ទាត់ភាពក្រីក្រតាមលទ្ធផលពិនិត្យផ្ទៀងផ្ទាត់ឆ្នាំ ២០២៥ ត្រូវបានគណៈកម្មាធិការប្រជាជនខេត្តអនុម័ត និងក្រុមគ្រួសារដែលមានកូនបង្កើតរបស់អ្នកធ្វើសក្មភាពតស៊ូប្រយុទ្ធត្រូវរងផលប៉ះពាល់ដោយសារតែសារធាតុគីមីពុល។ ចំនួនផ្ទះសរុបត្រូវបានឧបត្ថម្ភគឺ ១.០៦៩ ខ្នង រួមទាំងផ្ទះសាងសង់ថ្មីចំនួន ៩៤៩ ខ្នង និងផ្ទះជួសជុលចំនួន ១២០ ខ្នង។
កម្រិតឧបត្ថម្ភសម្រាប់ការសាងសង់ថ្មីគឺ ៨០ លានដុងមួយខ្នង កម្រិតឧបត្ថម្ភសម្រាប់ការជួសជុលគឺ ៤០ លានដុងមួយខ្នង។ ក្រៅពីការឧបត្ថម្ភរបស់រដ្ឋ ខេត្តលើកទឹកចិត្តកៀរគរប្រភពធនធានសង្គមូបនីយកម្ម ប្រភពបដិភាគបន្ថែមទៀតពីក្រុមគ្រួសារនិងផ្តល់អាទិភាពដល់ការសាងសង់បន្ទប់អនាម័យ។ ថវិកាសរុបសម្រាប់កម្មវិធីនេះមានជាង ៨០ ពាន់លានដុង។ ពេលវេលាបញ្ចប់រួចរាល់គឺនៅត្រីមាសទី ៣ ឆ្នាំ ២០២៦។
គណៈកម្មាធិការប្រជាជនខេត្តប្រគល់ឲ្យមន្ទីរសាងសង់ធ្វើជាអធិបតីក្នុងការអនុវត្ត ណែនាំលក្ខណៈវិនិច្ឆ័យផ្ទះលំនៅ ត្រួតពិនិត្យ ផ្ទៀងផ្ទាត់ដំណើរនិងគុណភាពនៃការសាងសង់។ មន្ទីរ ស្ថាប័នពាក់ព័ន្ធ គណៈកម្មាធិការរណសិរ្សមាតុភូមិវៀតណាមខេត្ត បញ្ជាការដ្ឋានយោធាខេត្ត នគរបាលខេត្ត និងគណៈកម្មាធិការប្រជាជនឃុំ សង្កាត់មានភារកិច្ចពិនិត្យផ្ទៀងផ្ទាត់មុខសញ្ញា កៀរគរប្រភពធនធាន រៀបចំការអនុវត្ត និងពិនិត្យផ្ទៀងផ្ទាត់ដំណើរការស្របតាមសេចក្តីកំណត់។
ឃុំ សង្កាត់ពិនិត្យផ្ទៀងផ្ទាត់ និងធ្វើបញ្ជីឧបត្ថម្ភធានាថាមិនលំអៀង ជាក់ច្បាស់ ចំមុខសញ្ញា មិនជាន់គ្នាជាមួយនឹងកម្មវិធីឧបត្ថម្ភផ្សេងៗ។ ពង្រឹងការត្រួតពិនិត្យ ផ្ទៀងផ្ទាត់ ធានាការឧបត្ថម្ភលំនៅឋានត្រូវបានអនុវត្តស្របតាមសេចក្តីកំណត់ មិនឱ្យមានការខាតបង់ ការចាយខ្ជះខ្ជាយ អំពើពុករលួយ ឬការអនុវត្តអវិជ្ជមានក្នុងអំឡុងពេលអនុវត្ត៕
អត្ថបទ៖ ទន់កៀត
ប្រែសម្រួល៖ សិរីសួស្តី
