ជាខ្សែសុខាភិបាលនៅជិតប្រជាជនបំផុត ប្រព័ន្ធសុខាភិបាលមូលដ្ឋានដើរតួនាទីយ៉ាងសំខាន់ខ្លាំងណាស់ក្នុងការពិនិត្យ ព្យាបាលជំងឺបឋម ការគ្រប់គ្រងសុខភាពសហគមន៍ ការបង្ការ ទប់ស្កាត់ជំងឺ និងការអនុវត្តកម្មវិធីគោលដៅជាតិស្តីអំពីសុខាភិបាល។ ក៏ប៉ុន្តែ ប៉ុន្មានឆ្នាំកន្លងហើយ រួមជាមួយនឹងការទទួលបន្ទុកការងារកាន់តែកើនឡើងពីមួយថ្ងៃទៅមួយថ្ងៃ កម្មាភិបាលនៃសុខាភិបាលថ្នាក់មូលដ្ឋាននានានៅតែប្រឈមមុខនឹងការលំបាកលំបិនជាច្រើន ដោយសារតែលក្ខខណ្ឌការងារមិនគ្រប់គ្រាន់ ប្រាក់ចំណូល និងរបបអនុគ្រោះមិនសមស្របនឹងបន្ទុកដែលប្រគល់ឲ្យ។
ដូច្នេះ រដ្ឋាភិបាលបានអនុម័តអនុក្រឹត្យលេខ 192/2026/NĐ-CP ត្រូវបានចាត់ថាជាការយកចិត្តទុកដាក់ ការលើកទឹកចិត្តទាន់ពេលវេលាចំពោះកងកម្លាំងដែលកំពុងធ្វើការទាំងយប់ទាំងថ្ងៃបំពេញភារកិច្ចការពារ ថែទាំសុខភាពប្រជាជនតាំងពីខ្សែបឋម។
យោងតាមអនុក្រឹត្យលេខ 192/2026/NĐ-CP កម្មាភិបាលសុខាភិបាលបានទទួលប្រាក់ឧបត្ថម្ភពិសេសដោយឡែកចំពោះសកម្មភាពប្រចាំការ ការវះកាត់ ជំនាញការ និងការបង្ការ ទប់ស្កាត់ជំងឺ ព្រមទាំងបង្កើនកម្រិតឧបត្ថម្ភប្រចាំខែសម្រាប់បុគ្គលិកសុខាភិបាលភូមិ និគម ក្រុមលំនៅឋាន និងឆ្មបភូមិ និគម។ គួរឲ្យចាប់អារម្មណ៍នោះ កម្មាភិបាលសុខាភិបាលប្រចាំការ ២៤/២៤ ម៉ោងនៅស្ថានីយសុខាភិបាលឃុំ សង្កាត់ក្នុងមួយវេនប្រចាំការនឹងទទួលបានប្រាក់ឧបត្ថម្ភចំនួន ១៨៥.០០០ ដុងក្នុងមនុស្សម្នាក់។ គោលនយោបាយថ្មីត្រូវបានរំពឹងថានឹងរួមចំណែកជួយកាត់បន្ថយការលំបាក លើកទឹកចិត្តកងជួរសុខាភិបាលថ្នាក់មូលដ្ឋានឲ្យស្ងប់ចិត្តបំពេញការងារ។
ជាឃុំជាប់ព្រំដែន បច្ចុប្បន្ន មឿងចា មានប្រជាជនជិត ១៤.៤០០ នាក់ មានជាង ២.៦០០ ក្រុមគ្រួសារ រស់នៅក្នុង ២៤ ភូមិនិគម ហើយតម្រូវការថែទាំសុខភាពរបស់ប្រជាជនកាន់តែកើនឡើងពីមួយថ្ងៃទៅមួយថ្ងៃ។ រយៈពេលកន្លង កងជួរកម្មាភិបាលនៃស្ថានីយសុខាភិបាលឃុំ មឿងចា តែងតែទទួលបន្ទុកការងារយ៉ាងច្រើនដូចជាការពិនិត្យសុខភាព ព្យាបាលជំងឺ ការគ្រប់គ្រងសុខភាពប្រជាជន និងរៀបចំការចាក់ថ្នាំបង្ការរោគ។ ពួកគាត់ក៏ចូលរួមក្នុងការបង្ការ ទប់ស្កាត់ជំងឺ ផ្សព្វផ្សាយអប់រំសុខភាព តាមដានស្ថានភាពរោគរាតត្បាតនៅក្នុងភូមិ និគម។ ប្រការនេះទាមទារឱ្យកងជួរស្ថានីយសុខាភិបាលឃុំត្រូវច្បាមជាប់នៅមូលដ្ឋាន ធ្វើការថែមម៉ោង និងត្រៀមខ្លួនជាស្រេចប្រចាំការសង្គ្រោះបន្ទាន់ទាំងយប់ ទាំងថ្ងៃ។
យោងតាមវេជ្ជបណ្ឌិត ឡ វ៉ាន់ធើយ ប្រធានស្ថានីយសុខាភិបាលឃុំ មឿងចា ឲ្យដឹងថា ការកែសម្រួលប្រាក់ឧបត្ថម្ភប្រចាំការជួយឲ្យកម្មាភិបាលនៃសុខាភិបាលកាត់បន្ថយការលំបាកលំបិនក្នុងវេនប្រចាំការដែលយូរ បង្កើតកម្លាំងចលករឲ្យស្ងប់ចិត្តបំពេញការងារ។ សាមីខ្លួនលោកផ្ទាល់ក៏សង្ឃឹមថានឹងមានយន្តការបន្ថែមទៀតសម្រាប់ទាក់ទាញ រក្សាបុគ្គលិកដែលមានគុណភាពធ្វើការងាររយៈពេលយូរអង្វែងនៅខ្សែមូលដ្ឋាន។ នៅពេលកងជួរស្ថិរភាព ស្ថានីយសុខាភិបាលនឹងអនុវត្តការគ្រប់គ្រងសុខភាពប្រជាជនទាំងមូលកាន់តែមានប្រសិទ្ធភាព ថែទាំអ្នកជំងឺនៅក្នុងមូលដ្ឋាន រួមចំណែកកាត់បន្ថយបន្ទុកការងារសម្រាប់ខ្សែរយៈលើ។
មិនត្រឹមតែកែសម្រួលរបបប្រាក់ឧបត្ថម្ភសម្រាប់កម្មាភិបាលសុខាភិបាលនៅតាមស្ថានីយសុខាភិបាលឃុំ សង្កាត់ អនុក្រឹត្យលេខ ១៩២ ក៏បានកំណត់កម្រិតឧបត្ថម្ភថ្មីសម្រាប់បុគ្គលិកសុខាភិបាលភូមិ និគម ក្រុមលំនៅឋាន និងឆ្មបភូមិ និគមផងដែរ។ តាមរយៈនោះ បុគ្គលិកសុខាភិបាលភូមិ និគម ក្រុមលំនៅឋាន និងឆ្មបភូមិ និគមធ្វើការនៅក្នុងភូមិដែលមានចំនួនក្រុមគ្រួសារពី ៣៥០ ឡើងទៅ ភូមិ និគមជាឃុំតំបន់ដែលមានស្ថានភាពលំបាកដូចដែលបានកំណត់របស់រដ្ឋាភិបាល ឬក្រុមលំនៅឋាន អនុសង្កាត់មានចំនួនក្រុមគ្រួសារពី ៥០០ ឡើងទៅបានទទួលកម្រិតឧបត្ថម្ភស្មើនឹង ០,៧ ដងប្រាក់ខែគោល។ ភូមិសាស្រ្តក្រៅពីនោះបានទទួលកម្រិតឧបត្ថម្ភស្មើនឹង ០,៥ ដងប្រាក់ខែគោល។
អស់រយៈពេលជាង ១០ ឆ្នាំមកហើយ បងស្រី ឡ ធីដឿង នៅភូមិ ណឹមឌិច ឃុំ មឿងចា ជាឆ្មបភូមិ និគមផង និងជាគិលានុបដ្ឋាយិកាភូមិ និគមផង។ ទោះបីជាត្រូវទទួលបន្ទុកការងារជាច្រើន ធ្វើដំណើរទៅមកញឹកញាប់ យ៉ាងលំបាកក៏ដោយ តែអស់រយៈពេលជាច្រើនឆ្នាំកន្លង ប្រាក់ឧបត្ថម្ភប្រចាំខែរបស់គាត់ទទួលបានតែជាង ៧០០.០០០ ដុងតែប៉ុននោះ។ ប្រាក់ចំណូលទាប និងរបបអនុគ្រោះនៅមានកម្រិត បានធ្វើឱ្យការរស់នៅរបស់គាត់ជួបលំបាកមិនតិចឡើយ។ បងស្រី ដឿង បង្ហើបប្រាប់ មានពេលខ្លះបងស្រីចង់បញ្ឈប់ការងារ ប៉ុន្តែដោយក្តីស្រឡាញ់របស់គាត់ចំពោះកុមារ ហើយមានក្តីសុខនៅពេលឮសំឡេងទារកយំក្រោយវេនជួយសម្រាលកូនបានជោគជ័យម្តងៗ បានជំរុញឱ្យបងស្រីបន្តការប្រឹងប្រែង។
មិនមែនដោយឡែកតែឃុំ មឿងចា ទេ នៅឃុំព្រំដែន ណឹមកែ បណ្តាញសុខាភិបាលមូលដ្ឋានកំពុងដើរតួនាទីយ៉ាងសំខាន់ក្នុងការងារថែទាំសុខភាពប្រជាជន។ បច្ចុប្បន្ន ឃុំទាំងមូលមានចំនួន ៩ ក្នុងចំណោម ១៤ ភូមិ និគម មានចាត់បុគ្គលិកសុខាភិបាល និងឆ្មបភូមិ និគមចំនួន ២ នាក់។ ក្រៅពីភារកិច្ចវិជ្ជាជីវៈ បុគ្គលិកសុខាភិបាលជាច្រើនក៏ដើរតួនាទីបន្ថែមជាសហការីចំនួនប្រជាជន និងចូលរួមក្នុងសកម្មភាពសង្គមផ្សេងៗ ជាច្រើនទៀតនៅក្នុងមូលដ្ឋាន។
ក្នុងនាមជាបុគ្គលិកសុខាភិបាលភូមិ ណឹមកែ បងស្រី ឡ ធីថាន តែងតែចុះទៅផ្ទះប្រជាជនជាប្រចាំ ដើម្បីផ្សព្វផ្សាយអំពីការបង្ការ ទប់ស្កាត់ជំងឺ ណែនាំអំពីអនាម័យបរិស្ថាន តាមដានសុខភាពប្រជាជន ចែកថ្នាំពេទ្យ និងអនុវត្តភារកិច្ចរបស់សហការីប្រជាសាស្ដ្រ។ បងស្រីប្រាប់ថា ប្រការរដ្ឋាភិបាលកែសម្រួលគោលនយោបាយប្រាក់ឧបត្ថម្ភជាការលើកទឹកចិត្តទាន់ពេលវេលាសម្រាប់កងជួរសុខាភិបាលថ្នាក់មូលដ្ឋាន។ បងស្រី និងអ្នករួមការងារតែងតែមានបំណងថាប្រការកែសម្រួលប្រាក់ឧបត្ថម្ភជាប្រចាំនឹងរួមចំណែកបង្កើតកម្លាំងចលករបន្ថែមទៀតសម្រាប់កម្មាភិបាលសុខាភិបាលស្ងប់ចិត្តធ្វើការ បង្កើនគុណភាពនៃការពិនិត្យ ការព្យាបាលជំងឺ និងការថែទាំសុខភាពបឋមសម្រាប់ប្រជាជន។ នេះក៏ជាមូលដ្ឋានសម្រាប់ទាក់ទាញ និងរក្សាកងជួរសុខាភិបាលផ្សារភ្ជាប់យូរអង្វែងនឹងខ្សែមូលដ្ឋាន។
យោងតាមលោក ង្វៀន តៀនថាញ់ ប្រធានគណៈកម្មាធិការប្រជាជនឃុំ ណឹមកែ ការបង្កើនប្រាក់ឧបត្ថម្ភប្រចាំខែសម្រាប់បុគ្គលិកសុខាភិបាលភូមិ និគម និងឆ្មបភូមិ និគមយោងតាមអនុក្រឹត្យលេខ 192/2026/NĐ-CP មានអត្ថន័យសំខាន់ក្នុងការពង្រឹង លើកកម្ពស់ប្រសិទ្ធភាពនៃបណ្តាញសុខាភិបាលមូលដ្ឋាន ជាពិសេសនៅភូមិសាស្រ្តតំបន់ជ្រៅ តំបន់ឆ្ងាយ តំបន់ព្រំដែន។ ប្រការកើនប្រាក់ឧបត្ថម្ភមិនត្រឹមតែបង្កើនតួនាទីរបស់សុខាភិបាលភូមិ និគម កាត់បន្ថយសម្ពាធលើស្ថានីយសុខាភិបាលឃុំប៉ុននោះទេ ថែមទាំងរួមចំណែកជួយប្រជាជនទទួលបានសេវាថែទាំសុខភាពបឋមទាន់ពេលវេលា ងាយស្រួល និងកាន់តែមានប្រសិទ្ធភាពនៅកម្រិតមូលដ្ឋានផ្ទាល់តែម្តង។
រួមជាមួយនឹងការវិនិយោគលើហេដ្ឋារចនាសម្ព័ន្ធ គ្រឿងឧបករណ៍ និងការលើកកម្ពស់គុណភាពធនធានមនុស្ស គោលនយោបាយអនុគ្រោះតែងតែជាកត្តាសំខាន់សម្រាប់ទាក់ទាញ និងរក្សាកងជួរកម្មាភិបាលធ្វើការនៅខ្សែមូលដ្ឋាន។ ជាខេត្តតំបន់ភ្នំ ដៀនបៀន នៅប្រឈមមុខនឹងការលំបាកជាច្រើន ការកែសម្រួលរបបប្រាក់ឧបត្ថម្ភកាន់តែមានអត្ថន័យជាក់ស្តែង រួមចំណែកលើកទឹកចិត្តកងជួរកម្មាភិបាលនៃសុខាភិបាលស្ងប់ចិត្តធ្វើការ បន្តលះបង់ដើម្បីសុខភាពសហគមន៍៕
អត្ថបទ៖ ផានគ្វឹន
ប្រែសម្រួល៖ អៀងថាន់
