យោងតាមគណៈកម្មាធិការប្រជាជនខេត្ត តីនិញ មូលដ្ឋានកំពុងអនុវត្តសកម្មភាពជាច្រើនក្នុងពេលតែមួយសំដៅទៅលើការថែទាំ ឧបត្ថម្ភប្អូនៗ កុមារដែលស្ថិតក្នុងស្ថានភាពលំបាក កុមារក្រីក្រ កុមារជាជនជាតិភាគតិចដោយសកម្មភាពជាក់ស្តែង។ ដំណាលពេលនោះ ខេត្តបង្កើត "ខែលឌីជីថល" ពីមួយជំហានទៅមួយជំហានដើម្បីការពារកុមារនៅក្នុងបរិស្ថានលើប្រព័ន្ធអនឡាញ ជួយការពារប្អូនៗ កុមារមានសុវត្ថិភាពពេលប្រឈមមុខនឹងហានិភ័យក្នុងយុគសម័យបច្ចេកវិទ្យា។ ដោយមានការរួមដៃគ្នារបស់សង្គមទាំងមូល កុមារក្នុងខេត្តកាន់តែមានលក្ខខណ្ឌរៀនសូត្រ លេងកម្សាន្តសប្បាយ និងធំលូតលាស់គ្រប់ជ្រុងជ្រោយ។
ក្នុងកម្មវិធីនេះ ថ្នាក់ដឹកនាំខេត្តបានជូនអាហារូបករណ៍ទៅសិស្សដែលមានជីវភាពលំបាកលំបិនរៀនសូត្រពូកែចំនួន ៤០ រូប ជូនអំណោយកុមារដែលមានជីវភាពខ្វះខាតចំនួន ៦០ រូប ជូនសិក្ខូបករណ៍ទៅសិស្សជម្នះការលំបាកឧស្សាហ៍រៀនសូត្រចំនួន ៧៥ រូប និងជូនកង់ទៅសិស្សមានជីវភាពខ្វះខាតចំនួន ២៥ គ្រឿង ផ្តល់ល័ក្ខខ័ណ្ឌមធ្យោបាយសម្រាប់ប្អូនៗ ធ្វើដំណើរទៅកាន់សាលារៀន។ អំណោយមានអត្ថន័យទាំងនេះមិនត្រឹមតែជួយឧបត្ថម្ភផ្នែកសម្ភារៈប៉ុននោះទេ ថែមទាំងបង្កើតទំនុកចិត្ត ការលើកទឹកចិត្តដល់ប្អូនៗ ឱ្យជម្នះការលំបាក ឈានឡើងក្នុងការសិក្សា និងការរស់នៅថែមទៀតផង។
អនុវត្តខែសកម្មភាពដើម្បីកុមារឆ្នាំ ២០២៦ ក្នុងភូមិសាស្រ្តខេត្ត តីនិញ លោក ផាម តឹនហ្វា អនុប្រធានគណៈកម្មាធិការប្រជាជនខេត្ត តីនិញ មានប្រសាសន៍ថា ខេត្តនឹងបន្តពង្រឹងការយកចិត្តទុកដាក់ បញ្ជារបស់គណៈកម្មាធិការបក្ស អាជ្ញាធរ មន្ទីរ ផ្នែក និងមូលដ្ឋានចំពោះការងារថែទាំ អប់រំ និងការពារកុមារ ព្រមទាំងជំរុញការផ្តល់សេវាកម្មគ្រប់ជ្រុងជ្រោយសម្រាប់កុមារ ជាពិសេសគឺការការពារកុមារនៅក្នុងបរិស្ថាននៅលើប្រព័ន្ធអនឡាញ និងធានាសុវត្ថិភាពជូនប្អូនៗ កុមារក្នុងយុគសម័យឌីជីថល។
ក្នុងឱកាសខែសកម្មភាពដើម្បីកុមារឆ្នាំ ២០២៦ លោក ផាម តឹនហ្វា ស្នើឱ្យគ្រប់លំដាប់ថ្នាក់ គ្រប់ផ្នែក អង្គការមហាជន កងកម្លាំងប្រដាប់អាវុធ សហគមន៍សហគ្រាស គ្រប់អង្គការ បុគ្គល និងប្រជាជនទាំងមូលបន្តរួមដៃគ្នាជាមួយនឹងសកម្មភាពជាក់ស្តែងសំដៅការថែទាំ ឧបត្ថម្ភប្អូនៗ កុមារស្ថិតក្នុងស្ថានភាពលំបាក កុមារក្រីក្រ កុមារជាជនជាតិភាគតិច ដើម្បីឱ្យកុមារទាំងអស់បានរស់នៅក្នុងបរិស្ថានសុវត្ថិភាព ពោរពេញដោយក្តីស្រឡាញ់ និងការធំលូតលាស់គ្រប់ជ្រុងជ្រោយ។
បន្ទាប់ពីនោះ ផ្តល់ចំណេះដឹង បំណិន និងសមត្ថភាពឌីជីថលចាំបាច់សម្រាប់ការអភិវឌ្ឍគ្រប់ជ្រុងជ្រោយ ក្លាយជាពលរដ្ឋឌីជីថលប្រកបដោយសុវត្ថិភាព មានទំនួលខុសត្រូវ ព្រមទាំងកៀរគរ និងផ្តល់អាទិភាពរាល់ប្រភពកម្លាំងសង្គមសំដៅអនុវត្តសិទ្ធិកុមារឲ្យកាន់តែល្អប្រសើរ៕
អត្ថបទ និងរូបថត៖ យ៉ាងផឿង
ប្រែសម្រួល៖ អៀងថាន់
