ខេត្ត ឡាយចូវ មានបងប្អូនជនជាតិភាគតិចជាង ៨៥% ដោយមានខ្សែបន្ទាត់ព្រំដែនប្រវែងជាង ២៦៥ គីឡូម៉ែត្រ។ ប៉ុន្មានឆ្នាំកន្លងហើយ ខេត្តតែងតែច្បាមជាប់ អនុវត្តយ៉ាងពេញលេញរាល់របប គោលនយោបាយរបស់បក្សនិងរដ្ឋដើម្បីបង្កើតល័ក្ខខ័ណ្ឌល្អបំផុតសម្រាប់កងជួរប្រធានភូមិនិងអ្នកមានប្រជាប្រិយភាពធ្វើសកម្មភាព។
ក្នុងដំណើរការការពារជាយដែននិងកសាងមាតុភូមិខេត្ត ឡាយចូវ កងជួរប្រធានភូមិ អ្នកមានប្រជាប្រិយភាពតែងតែជាទីបង្អែកតភ្ជាប់ដ៏រឹងមាំ ជាស្ពានមេត្រីរវាងគំនិតបក្ស ទឹកចិត្តប្រជាជន។ តាមរយៈសំឡេង ប្រជាប្រិយភាពនិងសកម្មភាពជាក់ស្តែងរបស់ខ្លួន អ្នកមានប្រជាប្រិយភាពបាននាំយកគោលការណ៍ មាគ៌ារបស់បក្ស គោលនយោបាយច្បាប់របស់រដ្ឋមកជិតបងប្អូនជនជាតិ ជួយពង្រឹងធ្លុងមហាសាមគ្គី បង្កើតកម្លាំងរួមដ៏រឹងមាំ និងបង្កើនទំនុកចិត្តរបស់ប្រជាជនលើបក្ស អាជ្ញាធរ។ ក្នុងការអនុវត្តភារកិច្ចការពារជាតិ សន្តិសុខ អ្នកមានប្រជាប្រិយភាព និងប្រធានភូមិគឺជា "ខែលនៃភាពសុខក្សេម" ជា "បង្គោលតម្រុយសីមារស់" មោះមុតនៅជាយដែននៃមាតុភូមិ។
នៅតំបន់ព្រំដែន ប្រធានភូមិ អ្នកមានប្រជាប្រិយភាពជាច្រើននាក់គឺជាគំរូសម្រាប់មាមីងបងប្អូន អ្នកភូមិត្រាប់តាម ជាជំនួយការពីចម្ងាយរបស់អាជ្ញាធរក្នុងវិស័យជាច្រើន។ លោក វ៉ាង អាចិញ អ្នកមានប្រជាប្រិយភាព ហើយជាប្រធានភូមិ ង៉ាយធៅ ឃុំ ស៊ីលើលៅ បញ្ជាក់ថា លោកនិងអ្នកភូមិតែងតែជឿទុកចិត្តយ៉ាងមុតមាំទៅលើបក្ស រដ្ឋ រួមជាមួយនឹងអាជ្ញាធរមូលដ្ឋាន និងកងកម្លាំងការពារយ៉ាងរឹងមាំព្រំដែនកន្លែងដែលខ្លួនរស់នៅ រួមដំណើរជួយមាមីងបងប្អូនអភិវឌ្ឍសេដ្ឋកិច្ច សាមគ្គីផ្សារភ្ជាប់នឹងកសាងភូមិស្រុកកាន់តែស្ថិរភាពពីមួយថ្ងៃទៅមួយថ្ងៃ។
ជាបុគ្គលមួយរូបក្នុងចំណោមអ្នកមានប្រជាប្រិយភាពចំនួន ៣០ រូបទទួលប័ណ្ណសរសើរពីប្រធានគណៈកម្មាធិការប្រជាជនខេត្ត ឡាយចូវ លោក ជូ ប៉ទឺ នៅភូមិ ហ្កខា ឃុំ ធូលុំ មានប្រសាសន៍ថា មាមីងបងប្អូនជនជាតិ ហាញី នៅតំបន់ព្រំដែនមានជីវភាពរស់នៅកាន់យតែធូរធារ អភិវឌ្ឍអាស្រ័យដោយមានការយកចិត្តទុកដាក់ ការវិនិយោគរបស់រដ្ឋ។ ប្រជាជនសាមគ្គីចិត្តមួយថ្លើមមួយ ប្តេជ្ញាចិត្តការពារព្រំដែនមាតុភូមិយ៉ាងរឺងមាំ។
បច្ចុប្បន្នខេត្ត ឡាយចូវ មានអ្នកមានប្រជាប្រិយភាពចំនួន ៩៥៦ នាក់ និងប្រធានភូមិចំនួន ៩៥៦ នាក់។ ប៉ុន្មានឆ្នាំកន្លង កងជួរនេះបានដើរតួនាទីនាំមុខក្នុងការចលនាប្រជាជនអភិវឌ្ឍផលិតកម្ម លុបបំបាត់ភាពអត់ឃ្លានកាត់បន្ថយភាពក្រីក្រ កសាងជនបទថ្មី ព្រមទាំងសហប្រតិបត្តិការយ៉ាងស្អិតល្មួតជាមួយកងកម្លាំងសមត្ថកិច្ចការពារអធិបតេយ្យភាពជាតិ និងសន្តិសុខព្រំដែនជាតិយ៉ាងរឹងមាំ។ ការចូលរួមចំណែកដោយស្ងៀមស្ងាត់តែខ្ជាប់ខ្ជួនរបស់ពួកគាត់បានជួយពង្រឹងទំនុកចិត្តរបស់ប្រជាជនចំពោះបក្ស រដ្ឋ និងកសាង "ក្បួនយុទ្ធសាស្រ្តទឹកចិត្តប្រជាជន" ដ៏រឹងមាំនៅជាយដែននៃមាតុភូមិ។
ក្នុងកម្មវិធី គណៈប្រតិភូបានតាមដានបទយកការណ៍ឆ្លុះបញ្ចាំងពីសកម្មភាពរបស់អ្នកមានប្រជាប្រិយភាព ប្រធានភូមិនៅឃុំព្រំដែនចំនួន ១១ ផ្លាស់ប្តូររវាងអ្នកមានប្រជាប្រិយភាព ប្រធានភូមិគំរូ។
អញ្ជើញថ្លែងសុន្ទរកថានៅក្នុងកម្មវិធី អនុប្រធានអចិន្ត្រៃយ៍នៃគណៈកម្មាធិការប្រជាជនខេត្ត ឡាយចូវ លោក តុង ថាញ់ហាយ សម្តែងការដឹងគុណយ៉ាងជ្រាលជ្រៅចំពោះការរួមចំណែកដ៏ធំធេងដោយស្ងាត់ស្ងៀមរបស់អ្នកមានប្រជាប្រិយភាព និងប្រធានភូមិក្នុងចំណោមបងប្អូនជនជាតិភាគតិច។ អនុប្រធានអចិន្ត្រៃយ៍នៃគណៈកម្មាធិការប្រជាជនខេត្តមានគោលបំណងនិងជឿជាក់ថា ប្រធានភូមិ អ្នកមានប្រជាប្រិយភាពនឹងបន្តថែរក្សាលើកតម្កើងប្រពៃណីដ៏ល្អប្រសើររបស់មាតុភូមិ រក្សារឹងមាំភាពក្លៀវក្លានិងស្មារតីទទួលខុសត្រូវ បន្តធ្វើជាគំរូភ្លឺថ្លានៅក្នុងសហគមន៍ រួមចំណែកកសាងខេត្ត ឡាយចូវ ឱ្យកាន់តែរីកចម្រើនសម្បូរបែបថែមទៀត។
ដើម្បីឱ្យប្រជាជននៅព្រំដែនក្លាយជាបង្គោលតម្រុយសីមារស់ ក្នុងនោះតួនាទីដ៏សំខាន់បំផុតរបស់អ្នកមានប្រជាប្រិយភាព ប្រធានភូមិ អនុប្រធានអចិន្ត្រៃយ៍នៃគណៈកម្មាធិការប្រជាជនខេត្តបានស្នើឱ្យគណៈកម្មាធិការបក្ស អាជ្ញាធរ រណសិរ្សមាតុភូមិ និងអង្គការមហាជនក្នុងខេត្តសហប្រតិបត្តិការយ៉ាងស្អិតល្មួតជាមួយកម្លាំងកងទ័ពការពារព្រំដែនបន្តផ្សព្វផ្សាយ និងអនុវត្តប្រកបដោយប្រសិទ្ធភាពនូវគោលការណ៍របស់បក្ស គោលនយោបាយរបស់រដ្ឋស្តីអំពីការងារជនជាតិ យកចិត្តទុកដាក់កាន់តែខ្លាំងលើជីវភាពរស់នៅទាំងផ្នែកសម្ភារៈ ស្មារតីរបស់កងជួរប្រធានភូមិ អ្នកមានប្រជាប្រិយភាពថែមទៀត។
អង្គភាពនានាបន្តកសាងនិងពង្រីកគំរូ តួយ៉ាង បង្កលក្ខណៈងាយស្រួលឱ្យប្រធានភូមិ អ្នកមានប្រជាប្រិយភាពចូលរួមយ៉ាងសកម្ម ទូលំទូលាយក្នុងចលនាប្រកួតប្រជែងស្នេហាជាតិ កសាងជនបទថ្មី អភិវឌ្ឍសេដ្ឋកិច្ច - សង្គម ថែរក្សាសន្តិសុខសណ្តាប់ធ្នាប់និងការពារអធិបតេយ្យភាពព្រំដែនជាតិឱ្យបានរឹងមាំ។
ក្នុងឱកាសនេះ ប្រតិភូចំនួន ១៣០ នាក់គឺជាប្រធានភូមិ អ្នកមានប្រជាប្រិយភាពគំរូក្នុងចំណោមបងប្អូនបណ្តាជនជាតិភាគតិចនៅភូមិសាស្រ្តខេត្ត ឡាយចូវ ត្រូវបានលើកតម្កើងនិងលើកសរសើរ។ នេះមិនត្រឹមតែជាការទទួលស្គាល់ចំពោះការរួមចំណែករបស់បុគ្គលឆ្នើមទាំងនេះប៉ុននោះទេ ថែមទាំងជាការលើកទឹកចិត្តដល់ប្រធានភូមិ អ្នកមានប្រជាប្រិយភាពឱ្យបន្តពង្រីកតួនាទីជា "ភ្លើងគប់" បំភ្លឺផ្លូវ ជាបង្អែកដ៏រឹងមាំសម្រាប់សហគមន៍បងប្អូនបណ្តាជនជាតិនៅតំបន់ព្រំដែននៃមាតុប្រទេស៕
អត្ថបទនិងរូបថត៖ ង្វៀនអ្វាញ់
ប្រែសម្រួល៖ ចន្ថា
